Agarra-me estes palos

Comemoraçones de l Die de la Cidade, de l 10 al 25 de Julho.

2009-07-06T15:47:00.006+01:00

10 DE JULHO
CUNCERTO PULA BANDA FILARMÓNICA MIRANDESA

11 DE JULHO
FESTIBAL DE LA CANÇON

12 DE JULHO
OULIMPÍADAS ÇPORTIBAS DE L CUNCEILHO

17 DE JULHO
Porgrama “Berano Total “ de la RTP direto de Miranda de l Douro
FESTIBAL DE DANÇAS MISTAS

18 DE JULHO
FESTIBAL DE PAULITEIROS

25 DE JULHO
TRIATO

Festibal de la Cançon "Mirandesa"?!

2009-07-06T14:20:00.008+01:00

Ne l próssimo die 11 de Julho, ls melhores tocadores i cantadores de l praino ban star ne l strado de l Jardin de ls Frades Trinus, pul XXIII Festibal de la Cançon de Miranda de l Douro.

L stórico festibal, ne l qual tenen nacido, alguas de las mais guapas músicas mirandesas, fai-se mais ua beç cun un regulamiento que deixa tristes to ls mirandeses. Mais ua beç, ne l regulamiento l mirandés ye bisto cumo ua lhéngua de opçon. Segundo l regulamiento, scrito tamien mais ua beç solo an pertués, "podem apresentar-se a concurso todas as pessoas individuais ou colectivas que não façam parte do júri ou da respectiva organização, podendo cada concorrente apresentar uma ou mais composições musicais inéditas, de duração não superior a quatro minutos, com tema livre e opcionalmente redigidas em Língua Mirandesa."

Assi mirandeses i mirandesas, se quien gobierna la nuossa tierra be l mirandés cumo ua lhéngua d'opçon, bós nun podeis fazer cumo eilhes.

Mirandeses i mirandesas apersentai to las buossas músicas na lhéngua de todos nós!

Que ne l festibal las arribas se sbarrulhen culs sonidos de la lhéngua mirandesa, que la giente bata palmas an mirandés, que se alçen de las sous cadeiras an mirandés, que canten an mirandés!

Ne l festibal de la cançon mirandesa, que se biba an mirandés!

Feira de anstrumentos Musicales, 25 de julho al 2 de Agosto

2009-06-30T22:54:00.008+01:00

Sob la respunsabilidade de la Delegaçon Regional de la Cultura de l Norte i la Junta de Castielha i Lhion, ne l ámbito de l POCTEP (Porgrama Ouperatibo de Coperaçon Transfronteiriço Spanha Pertual), nace l porjeto Lhinha Mestre, adonde se únen bários agentes culturales, para la rializaçon dua Feira de Strumientos Musicales Eibéricos que cuntará cula colaboraçon de la Galandun Galundaina Associaçon Cultural, Lérias Associaçon Cultural, Sons da Terra, AEPGA – Associaçon para l Studo i Proteçon de l Ganado Asinino i de l Folclore de Mogadouro.

Cun la feira quier-se dibulgar un setor de las artes i oufícios de raiç manufatural, cun ancidéncia para strumientos musicales, bien cumo proporcionar la anteraçon antre musiqueiros i custrutores, ua beç que ls musiqueiros son ls percipales outilizadores de ls strumientos tradecionales.

Un ancontro de música tradicional eibérica, un eibento que acuolhe custrutores de strumientos spondo i bendendo l sou trabalho: gaitas-de-fuolhes, cuncertinas, sanfonas, outros strumientos de cuordas, sopro, percusson i muitos mais...

La animaçon permanente será ua aposta zde, oufecinas de baile i música, apersentaçon de strumientos, atibidades para ninos, debates antre músicos... Ua ouportunidade para coinecer la bariadade i riqueza de la música tradecional

Mais anformaçones:

www.fim.pt.vu

Fiesta de San Judas Tadeu

2009-06-29T20:09:00.005+01:00

Ye yá ne ls próssimos dies 3 i 4 de Julho que se bai rializar ua de las grandes fiestas de la cidade de Miranda de l Douro. Ne l die 3, sesta-feira, hai ua grande Caracolada (tamien hai moelas!!) Ne l die 4, hai ua arruada cun l grupo de Pauliteiros de la Cidade de Miranda de l Douro, Torneio de Malha, sardinada i baile cun l grupo NV3.

Ls mardomos, la mocidade de l Bairro de la Terronha, cunbidan to la populaçon a star persente nua de las mais stóricas fiestas de la nuossa cidade.

Agarra-me estes Palos,

nas Fiestas de San Judas Tadeu!

Crocodilhos ne l Douro. Eilhes yá ls bírun.

2009-06-18T15:08:00.008+01:00

Ls crocodilhos andan mismo por ende i uns moços mirandeses yá ls bírun. L nuobo bídeo, hoije dibulgado pul "Agarra-me estes Palos" proba assi l'eisistencia dua nuoba raça de crocodilhos, l CROCODILHO MIRANDÉS.

Ls outores de l bídeo, son coinecidos cumo Chico i Topo, dous berdadeiros ambestigadores de l Riu Douro mirandés.

Acampamiento "Ala pra Miranda", 22 a 25 de Julho.

2009-06-15T17:35:00.004+01:00

Ne ls próssimos dies 22 a 25 de Julho, la Cámara Munecipal de Miranda de l Douro, ourganiza l acampamiento "Ala pra Miranda".

Durante l acampamiento ls partecipantes ban coinecer ls caminos, la fauna i la flora de l praino, fazer çporto i beilar al sonido de muita música tradecional.

L'acampamiento ye para moços de ls 18 als 30 anhos i ten lotaçon para 50 personas. L précio de las anscriçones ye de 50 €.

Mais anformaçones eiqui.

3ª Maratona de Futsal, Atenor, 11 i 12 de Julho.

2009-06-06T13:37:00.003+01:00

Lusíadas.

2009-06-04T16:52:00.003+01:00

Ls Lusíadas an Mirandés ban chegar inda este més a las lhibraries.

La traduçon de l'eipopeia de Camões, feita pulas manos de Amadeu Ferreira, al lhargo de 5 anhos, será apersentada ne l Clube Lhiterário de l Porto, ne l die 19 deste més.

La obra será tamien apersentada an Lhisboa, ne l die 2 de Julho, na Fundaçon Mário Soares i an Miranda de l Douro, ne l die 10 de Julho, l Die de la Cidade.

I assi, na tierra de ls boubos, nacírun mais 10 cantos i 1102 stáncias pula stória de la lhéngua mirandesa.

AGARRA-ME ESTES PALOS...

PULA LHÉNGUA MIRANDESA!

Fuonte: Diário Digital

"Do Japão à Terra de Miranda", manhana na RTP 2, pulas 21h00.

2009-05-30T18:16:00.004+01:00

La RTP 2 bai passar manhana, die 31 de maio, pulas 21h00, l decumentário

"Do Japão à Terra de Miranda",

produzido pul mirandés Leonel Viera i rializado por Miguel de Cía.

Yá sabeis manhana hai que birar las antenas puls lhados de la RTP2!

La nuossa agricultura stá an crise.

2009-05-29T19:37:00.006+01:00

Ls agricultores de l Praino Mirandés biben tiempos malos. La tierra astanho nun stá a dar cereal, cumo ne ls anhos passados, i ls agricultores yá se manifestórun al Menistério de la Agricultura.

Esta ye ua nuoba mala pul praino, i ye amportante amostra-la a to la giente, puis milhares de mirandeses biben de la agricultura i por esso la crise que anda por ende puode medrar mais un cachico por acá.

Fuonte: RTP

Menistério de la Cultura fai un nuobo mapa de l Praino Mirandés.

2009-05-20T22:20:00.005+01:00

Segundo l Menisterio de la Cultura de Pertual, este ye l nuobo mapa de l Reino de ls Boubos de Miranda de l Douro.

Postal de A. Leitão

Menistro de la cultura cumpara falantes de l Mirandés als «Boubos» gauleses!

2009-05-17T19:55:00.005+01:00

L menistro de la Cultura cumparou esta segunda-feira ls falantes de l Mirandés als «boubos» gauleses de la aldé de Astérix que ansistian an ampor la sue lhéngua minoritaria.

«Acá tamien hai uns boubos pertueses que biben an Miranda de l Douro i falan outra lhéngua», diç José António Pinto Ribeiro que, citado pula Lusa, augura muitas deficuldades a la «lhengua» falada an Miranda de l Douro. Stimular la spanson de la léngua ye «mui defícel», subretodo quando aqueilha nun ten atrás de si un grande númaro de falantes, splica.
Ls comentairos de l menistro benen an repuosta als anseios de l persidente de la Cámara de Miranda de l Douro, Manuel Rodrigo, que teme la transformaçon de l «Mirandés» nua lhéngua erudita scrita. L menistro promete "trabalhar an cunjunto cula outarquie i culs eruditos que trabalhan aqueilho", para tentar çfender la segunda lhéngua oufecial de Pertual.

Sr. Menistro,

Se quier falar de l Mirandés (falou hoije, an público, pula purmeira beç) fale!

Mas fale cumo un menistro debe falar!

Nós nun percisamos de poçones, percisamos de deçisones!

AGARRA-ME ESTES PALOS!

PROUA AN SER MIRANDÉS!

Fuonte: Lusa, TVI

Ua nuoba cumbençon..

2009-05-14T15:57:00.004+01:00

Hai por ende un blogue donde cada un de bós pode botar ua mano na construçon dua nuoba scrita de la lhéngua mirandesa.

L blogue cunta cun la partecipaçon de ls studiosos de l mirandés, cumo son Manuela Barros Ferreira, Amadeu Ferreira, Duarte Martins, entre outros i deiqui irá salir la perpuosta para la 2ª adenda a la cumbençon ourtográfica de la lhéngua mirandesa.

Se quejirdes botar ua mano antrai eiqui:

CUMBENÇON 2009

ARJM fui çtinguida cul prémio "Mérito Associativo Juvenil".

2009-05-13T15:42:00.006+01:00

La Associaçon Recreatiba de la Jubentude Mirandesa (ARJM) stubo, ne l passado die 8 de Maio, nas Jornadas "L Associatiismo Jubenil i l'Ouropa", rializadas an Braga, pula Direçon Regional de l Norte de l Anstituto Pertués de la Jubentude.
Estas jornadas tenien cumo propósito comemorar l die de l Associatibismo i l die de la Ouropa, bien cumo atribuir l Prémio de Mérito Associatibo Jubenil de la Region Norte.
Para l prémio, fui scolhida an cada çtrito de la region norte ua associaçon jubenil que durante l anho de 2008 se çtinguiu pulas sues buonas práticas ne l apoio al moços i a la quemunidade. Ne l çtrito de Bergáncia la ARJM fui la nomeada, i tal cumo las associaçones de l outros çtritos rializou ua apersentaçon, adonde mostrou l trabalho rializado al lhargo de 2008.
Passadas las apersentaçones ls júris reuniran, i decidiran repartir l prémio pulas 5 associaçones, bisto cada ua tener fines çtintos, sendo defícel fazer ua abaluaçon cumparatiba.
La direçon de la ARJM recebiu esta çtinçon cun sastifaçon, i agradeciu an nome de ls sous sócios a todos aqueilhes que la apoiórun na prossecuaçon de ls sous oujetibos.
La ARJM lamenta, inda assi, que este recoinecimiento a nible regional, nun acunteça al nible lhocal, adonde l ampato de l sou trabalho ye mais bisible.

Museu de las Tierras de Miranda, ua bida nuoba.

2009-05-07T16:57:00.008+01:00

La secretaira de Stado de la Cultura, Paula Fernandes dos Santos, besitou Miranda de l Douro. Acá anunciou, l porjeto de las obras de requalificaçon i ampliaçon de l Museu de las Tierras de Miranda, ourçadas an cerca de dous milhones i 200 mil ouros. La misma inda nun apuntou an cuncreto ua data para l arranque de la ampreitada, mas adiantandou que l sou ampeço stá prebisto para 2010.

Tal obra ben a publico quando fui tamien anunciado que l nuosso museu ye un de ls más besitados de l nuosso paiç. Astanho passórun pul museu más de 18 mil besitantes.

La Secretaira de Stado falou tamien de las obras que la nuossa Sé yá percisa fai anhos, mas nun dou qualquier anformaçon, solo antençones, l que segundo l persidiente de la Cámara Munecipal, Manuel Rodrigo nun son repuostas cuncretas nin pul museu, nin pula sé catedral.

Fuonte: RBA, Brigantia

Retrato: commons wikimedia

10º Festival Intercéltico de Sendim, 31 de Julho al 1 de Agosto.

2009-05-06T00:15:00.006+01:00

L "Festival Intercéltico de Sendim" que astanho bai festeijar la sue 10ª ediçon, antre ls dies 31 de Julho i 1 d'Agosto, yá ten cartaç i ye de ls buonos. Ne l purmeiro die, ls "Lenga Lenga" de Sendin i "Maria Salgado" ban abrir la fiesta que ancerrará cul sonido de ls suecos "Hedningarna" (retrato) que pula 2ª beç tornan al festibal. Die 1, "Korrontzi" ua de las bandas cun más feturo ne l folk ouropeu, i la spriente "Brigada Victor Jara" i "Llan de Cubel" de las Astúrias "ancerran la fiesta.

L festibal cunta tamien cun atebidades durante l die.

Mais anformaçones:

http://www.intercelticosendim.com/

Inda refunfunhegas, caramonico de mil demonhos?!

2009-05-06T00:08:00.001+01:00

NOIDZ - Root Sounds from the earth

2009-04-19T19:50:00.011+01:00

"Root Sounds from the earth", ye la cançon de ls NOIDZ ua banda de metal i música sprimental de l spácio. Ten cumo tocadores ZORK, MONKKA, DR.ZEE, ZDION i LUNATTIKA i ua de las sues modas ten tamien la gaita cun "Repasseado de Rio D'Onor".

Bacanças Çportibas 2009.

2009-04-18T20:59:00.001+01:00

La mocidade mirandesa fizo de la sue páscoa más ua beç ua fiesta. Anho apuis anho la nuossa mocidade ampeça a arrimar camino cuntra l'anterioridade i eiqui bos amostramos que an Miranda tamien hai bida. I la bida que se biu estes dies, na Caça l Crocodilho, ne ls jogos tradicionales, ne l paintball i ne l Torneio de las Geraçones, ye aqueilha que tenemos que fazer que la nuossa tierra tenga to ls dies i nun solo nas bacanças de la mocidade. L moço de l retrato amostra-bos l camino i spero que bos deia un cachico más de ganas de lhuitar to ls dies más un cachico pula nuossa tierra.

Jogos Tradecionales:

Jogo de las Bolas de Tinta:

Cena Cumbíbio:

Más Retratos de las Bacanças Çportibas 2009.

BIBE AN MIRANDÉS!

Torneio de las Geraçones 2009.

2009-04-14T00:04:00.008+01:00

Fui feito ne l passado sábado, die 11 de Abril, ne l Cumplexo Çportibo de la Terronha, l 3º Torneio de las Geraçones de Miranda de l Douro. L torneio fui ourganizado astanho puls mardomos Vitor Ribeiro, Ricardo Rocha i Toni Igreja i cuntou cula colaboraçon de la ARJM-Associaçon Recreatiba de la Jubentude Mirandesa.

Astanho chegórun a la final las geraçones de 1982 i 1983, i la ganhadora fui la geraçon de 1983. Partecipórun tamien las geraçones de 1980, 81, 84, 85, 86, 88 i 89.

Pula nuite fizo-se ua cena cumbíbio antre to la mocidade mirandesa. Neilha fui feita l'antrega de to ls galardones i nomeados ls próssimos mardomos de l torneio: Emanuel, Nelsito i Julinho. Assi s'ancerrórun las Bacanças Çportibas 2009. Parabienes a to ls partecipantes!

Agarra-me estes Palos, puis...

SER MIRANDÉS YE SEXY!

La nuossa Páscoa.

2009-04-04T13:41:00.001+01:00

La ARJM apersenta l cartaç de la 2ª ediçon de las Bacanças Çportibas:

Die 5 de Abril - Caça al Crocodilho - 14h00 - Bumbeiros
Die 7 de Abril - Paintball - 14h00 - Bumbeiros
Die 9 de Abril - Jogos Tradicionales - 14h00 - Lhargo de l Trinus
Die 11 de Abril - 3º Torneio de las Geraçones - 09h00 - Cumplexo Çportibo de la Terronha
20h30 - Cena Cumbíbio de la Mocidade Mirandesa i antrega de ls galardones.

Botaçon...

2009-03-31T16:26:00.003+01:00

L "3º Torneio de las Geraçones de Miranda de l Douro" yá stá a arrimar-se, i las geraçones ampeçan an segredo a purparar-se para l más caliente torneio de la bola de la nuossa cidade. Tal cumo Deco, Di Maria, Cristiano Ronaldo, Figo ó mismo José Mourinho, las eiquipas i sous capitans yá stan a dies d'antrar ne l stágio que ls puode lhebar a la bitória nel próssimo die 11 de l més de la páscoa.

Agora yá pudeis botar naqueilha eiquipa que bós pensais star an melhores condiçones!

Agarra-me estes Palos!

Ne l Torneio de las Geraçones!

Mirandum FM i Twitter!

2009-03-30T22:24:00.004+01:00

Ajuntamos esta semana mais alguas anzonices

a la barrica lhateral de l Agarra-me estes Palos.

Agora yá pudeis oubir eiqui l'emisson de la

Mirandum FM

"La rádio de la nuossa tierra!"

Tamien yá pudeis seguir l que ls Pauliteiros de Miranda

stan a fazer ne ls sous dies, pul twitter,

un páixaro que ye la nuoba moda que anda pul mundo de l'anternet!

http://twitter.com/pauliteiro

Agarra-me estes Palos!

Eilhes ténen que medrar antre lhaços i pingachos!

2009-03-29T00:07:00.005Z

Hai rapazicos i rapazicas que an Miranda ampeçan agora a beilar, a tomar gusto por beilar, i eilhes quieren medrar a beilar. Son eilhes las froles de l baile na nuossa tierra, son eilhes l feturo de ls pingachos, binte cincos i Padre Antonhos. Por esso dezir a un destes moços que sta spulso de l baile (que nun ye nada más que la prática dua tradiçon), ye l mismo que matar l feturo de la tradiçon, ye l mismo que matar la frole más guapa que medra ne l praino. I esso nun puode acuntecer nunca más, nien an Miranda, nien ne l praino, nien an nanhue lhugar de l mundo adonde ninos quérgan daprender ua tradiçon!

Ye papel de ls mais bielhos correjir l que un nino faga de malo, castiga-lo para que el daprenda que nunca más puode tornar a fazer cousas malas. Ye papel de ls mais bielhos amanharen l lhugar para ls ninos beilaren, las fatiotas, las atuaçones, ye funçon de ls mais bielhos assi ourganiza-los. Nun ye papel de ls mais bielhos spulsá-los dua cousa que tanto gusto lhes dá, nun ye papel de ls más bielhos matar las mais guapas froles que medran antre lhaços i pingachos.

A quien lo fizo i speramos que nunca más l faga solo se puode dezir que muito ten que daprender cun to las personas que perserbórun las danças tradecionales de las Tierras de Miranda anté als nuossos dies.

Agarra-me estes palos!

Quinteto Reis 84 - Cuncerto 25 Anhos. Die 11 de Abril, pulas 22h00, ne l Anfitriato de l Riu Fresno.

2009-03-26T17:52:00.007Z

L Quinteto Reis 84 ye un grupo de musica tradicional mirandesa i pertuesa, feito an Miranda de l Douro an 1984. Mas l quinteto, nun ye un grupo de musica tradecional cumo outro qualquier, ye arriba de todo un grupo que, al lhongo destes redadeiros 25 anhos, cunseguiu ajuntar bielhos amigos an torno dun oujetibo quemun: perserbar alguas de las más guapas musicas tradicionales de l nuosso Pertual.

Zde la sue criaçon más dua bintena i meia de musiqueiros fazirun parte desta fascinante formaçon musical, ls quales se eiran ajuntar outra beç para un grande spetáclo de comemoraçon de ls 25 anhos de carreira, ne l próssimo die 11 de Abril, pulas 22h00, ne l Anfitriato de l Riu Fresno, an Miranda de l Douro.

Ne l spetáclo bai haber inda atuaçones d'artistas cumbidados, ls Pauliteiros de la Cidade de Miranda de l Douro i ls Galandun Galundaina.

Agarra-me estes Palos!