Derretimos l carambelo... GEADA 2009!

Ne l ampeço nun parecie nada fácele derretir to l carambelo que habie caído an Miranda, ne l die 26 de Dezembro. Mas isso fui al ampeço...

Cumo quien lhuita siempre fai algo acuntecer, l carambelo ampeçou a derretir-se i GEADA a drento, la tierra quedou cada beç mais caliente, cumo an Miranda nunca habie stado an Dezembro.

Al lhargo de trés dies, la cidade de Miranda fui lhocal de fiesta, adonde giente benida de ls mais bariados lhugares de Pertual i tamien de l çtrangeiro beilórun al sonido de la música tradecional.

Gaitas i mais gaitas, bombos i mais bombos, caixas i mais caixas, palos i mais palos, fiesta i mais fiesta, de todo isso fui feito l Geada 2009.

La Associaçon Recreatiba de la Jubentude Mirandesa - ARJM i ls Pauliteiros de la Cidade de Miranda de l Douro benen assi agradecer a todos aqueilhes que tornórun l GEADA 2009 ua rialidade:

Cámara Munecipal de Miranda de l Douro

Anstituto Pertués de la Jubentude - IPJ

Caixa Geral de Depósitos

Junta de Freguesie de Miranda de l Douro

Associaçon Comercial i Andustrial de Miranda de l Douro

AECT - Douro/Duero

Associaçon Mirandanças

Pauliteiras de Miranda de l Douro

Ls mardomos de la Fogueira de l Galho 2009

Als jobens artistas mirandeses i a la pintora Balbina Mendes!

A la Associaçon Cultural de Artes Organizadas - ACARO i l Contagiarte

Als meios de comunicaçon regionais i nacionais que nos apoiórun na dibulgaçon.

A todos ls bolúntarios an çpecial als de la COZINHA (Ls maiores trabalhores de l festibal)!!

Als taberneiros de l BAR!

Ls pursores Hermínio Bernardo, Amadeu Ferreira, Domingos Raposo i Duarte Martins.

Ls pimpones atores i tocadores de l quelóquio.

Ls duonhos de las Adegas i al bino de la ARJM.

Ls Galheguinhos(as)!!

Aqueilhes que quedórun ne l acampamiento.

A todos ls partecipantes i besitantes i als mirandeses i mirandesas que botórun ua mano i çtubírun persentes ne l GEADA!

I als reis de l GEADA, ls MÚSICOS, gueiteiros, bombeiros i caixeiros i outros anstrumentistas que animórun, i muito bien, la fiesta:

Caretos de Podence

Bombos de São Sebastião de Darque

Gaiteiricos de Miranda de l Douro

Pauliteiras de Miranda de l Douro

Pauliteiricas de Miranda de l Douro

Ares da Raia

Anda Camino

Projecto Trepja

Pé na Terra

Roncos do Diabo

Coro de ls ninos de Miranda de l Douro i al pursor Paulo Meirinhos

Lenga-Lenga

i ls Tuttis Catraputtis,

i to aqueilhes que tocórun algua cousa...

GEADA 2010!

BAMOS DERRETIR L CARAMBELO?!

Chipre: ua biaige an grande. (1º cachico)

Ya tornamos de la partecipaçon ne l "4º Mediterranean Dance Folk Festival" ne l Chipre!

Yá stamos por acá fai algus dies mas solo hoije bos ampeçamos a cuntar las stórias dua biaige a ua tierra bien defrente de la nuossa.

La biaige para l Chipre fui bien lharga, tubimos que salir de Miranda para Madrid, adonde teniemos l'abion a la nuossa spera, apuis mais ua paraige d'alguas horas an Praga, na República Checa para bolar anté al nuosso çtino, la cidade de Larnaca que queda na metade grega de l Chipre.

La chegada a Madrid i l retrato cun Luís Figo:

La bista de l hotel an Larnaca:

Ne l purmeiro die ne l Chipre beilamos an Yeri, ua tierra cerca de Nicosia, la capital de l Chipre, donde fazimos l'ansaio giral pa ls trés dies d'atuaçones ne l festibal.

Atuaçon an Yeri i an Larnaca:

Pauliteiros ne l çfile an Larnaca:

Ne l festibal stubírun tamien grupos de to l'Ouropa (Grécia, Polónia, Eslobénia, Spanha, Bósnia, Croácia, Itália, Rússia, Bulgária i Arménia) i tamien un grupo de l Egipto.

Inda tenemos mais stórias para bos cuntar mas queda para outro die...

Se quejirdes ber mais retratos carregai eiqui.

Agarra-me estes Palos!

Pauliteiros de Miranda na Fiesta de l Abante!

Die 5 nós tamien stamos alhá!..

Festibal de la Cançon "Mirandesa"?!

Ne l próssimo die 11 de Julho, ls melhores tocadores i cantadores de l praino ban star ne l strado de l Jardin de ls Frades Trinus, pul XXIII Festibal de la Cançon de Miranda de l Douro.

L stórico festibal, ne l qual tenen nacido, alguas de las mais guapas músicas mirandesas, fai-se mais ua beç cun un regulamiento que deixa tristes to ls mirandeses. Mais ua beç, ne l regulamiento l mirandés ye bisto cumo ua lhéngua de opçon. Segundo l regulamiento, scrito tamien mais ua beç solo an pertués, "podem apresentar-se a concurso todas as pessoas individuais ou colectivas que não façam parte do júri ou da respectiva organização, podendo cada concorrente apresentar uma ou mais composições musicais inéditas, de duração não superior a quatro minutos, com tema livre e opcionalmente redigidas em Língua Mirandesa."

Assi mirandeses i mirandesas, se quien gobierna la nuossa tierra be l mirandés cumo ua lhéngua d'opçon, bós nun podeis fazer cumo eilhes.

Mirandeses i mirandesas apersentai to las buossas músicas na lhéngua de todos nós!

Que ne l festibal las arribas se sbarrulhen culs sonidos de la lhéngua mirandesa, que la giente bata palmas an mirandés, que se alçen de las sous cadeiras an mirandés, que canten an mirandés!

Ne l festibal de la cançon mirandesa, que se biba an mirandés!

Feira de anstrumentos Musicales, 25 de julho al 2 de Agosto

Sob la respunsabilidade de la Delegaçon Regional de la Cultura de l Norte i la Junta de Castielha i Lhion, ne l ámbito de l POCTEP (Porgrama Ouperatibo de Coperaçon Transfronteiriço Spanha Pertual), nace l porjeto Lhinha Mestre, adonde se únen bários agentes culturales, para la rializaçon dua Feira de Strumientos Musicales Eibéricos que cuntará cula colaboraçon de la Galandun Galundaina Associaçon Cultural, Lérias Associaçon Cultural, Sons da Terra, AEPGA – Associaçon para l Studo i Proteçon de l Ganado Asinino i de l Folclore de Mogadouro.

Cun la feira quier-se dibulgar un setor de las artes i oufícios de raiç manufatural, cun ancidéncia para strumientos musicales, bien cumo proporcionar la anteraçon antre musiqueiros i custrutores, ua beç que ls musiqueiros son ls percipales outilizadores de ls strumientos tradecionales.

Un ancontro de música tradicional eibérica, un eibento que acuolhe custrutores de strumientos spondo i bendendo l sou trabalho: gaitas-de-fuolhes, cuncertinas, sanfonas, outros strumientos de cuordas, sopro, percusson i muitos mais...

La animaçon permanente será ua aposta zde, oufecinas de baile i música, apersentaçon de strumientos, atibidades para ninos, debates antre músicos... Ua ouportunidade para coinecer la bariadade i riqueza de la música tradecional

Mais anformaçones:

www.fim.pt.vu

Fiesta de San Judas Tadeu

Ye yá ne ls próssimos dies 3 i 4 de Julho que se bai rializar ua de las grandes fiestas de la cidade de Miranda de l Douro. Ne l die 3, sesta-feira, hai ua grande Caracolada (tamien hai moelas!!) Ne l die 4, hai ua arruada cun l grupo de Pauliteiros de la Cidade de Miranda de l Douro, Torneio de Malha, sardinada i baile cun l grupo NV3.

Ls mardomos, la mocidade de l Bairro de la Terronha, cunbidan to la populaçon a star persente nua de las mais stóricas fiestas de la nuossa cidade.

Agarra-me estes Palos,

nas Fiestas de San Judas Tadeu!

Crocodilhos ne l Douro. Eilhes yá ls bírun.

Ls crocodilhos andan mismo por ende i uns moços mirandeses yá ls bírun. L nuobo bídeo, hoije dibulgado pul "Agarra-me estes Palos" proba assi l'eisistencia dua nuoba raça de crocodilhos, l CROCODILHO MIRANDÉS.

Ls outores de l bídeo, son coinecidos cumo Chico i Topo, dous berdadeiros ambestigadores de l Riu Douro mirandés.

Acampamiento "Ala pra Miranda", 22 a 25 de Julho.

Ne ls próssimos dies 22 a 25 de Julho, la Cámara Munecipal de Miranda de l Douro, ourganiza l acampamiento "Ala pra Miranda".

Durante l acampamiento ls partecipantes ban coinecer ls caminos, la fauna i la flora de l praino, fazer çporto i beilar al sonido de muita música tradecional.

L'acampamiento ye para moços de ls 18 als 30 anhos i ten lotaçon para 50 personas. L précio de las anscriçones ye de 50 €.

Mais anformaçones eiqui.

3ª Maratona de Futsal, Atenor, 11 i 12 de Julho.

Lusíadas.

Ls Lusíadas an Mirandés ban chegar inda este més a las lhibraries.

La traduçon de l'eipopeia de Camões, feita pulas manos de Amadeu Ferreira, al lhargo de 5 anhos, será apersentada ne l Clube Lhiterário de l Porto, ne l die 19 deste més.

La obra será tamien apersentada an Lhisboa, ne l die 2 de Julho, na Fundaçon Mário Soares i an Miranda de l Douro, ne l die 10 de Julho, l Die de la Cidade.

I assi, na tierra de ls boubos, nacírun mais 10 cantos i 1102 stáncias pula stória de la lhéngua mirandesa.

AGARRA-ME ESTES PALOS...

PULA LHÉNGUA MIRANDESA!

Fuonte: Diário Digital

"Do Japão à Terra de Miranda", manhana na RTP 2, pulas 21h00.

La RTP 2 bai passar manhana, die 31 de maio, pulas 21h00, l decumentário

"Do Japão à Terra de Miranda",

produzido pul mirandés Leonel Viera i rializado por Miguel de Cía.

Yá sabeis manhana hai que birar las antenas puls lhados de la RTP2!

Ua nuoba cumbençon..

Hai por ende un blogue donde cada un de bós pode botar ua mano na construçon dua nuoba scrita de la lhéngua mirandesa.

L blogue cunta cun la partecipaçon de ls studiosos de l mirandés, cumo son Manuela Barros Ferreira, Amadeu Ferreira, Duarte Martins, entre outros i deiqui irá salir la perpuosta para la 2ª adenda a la cumbençon ourtográfica de la lhéngua mirandesa.

Se quejirdes botar ua mano antrai eiqui:

CUMBENÇON 2009

ARJM fui çtinguida cul prémio "Mérito Associativo Juvenil".

La Associaçon Recreatiba de la Jubentude Mirandesa (ARJM) stubo, ne l passado die 8 de Maio, nas Jornadas "L Associatiismo Jubenil i l'Ouropa", rializadas an Braga, pula Direçon Regional de l Norte de l Anstituto Pertués de la Jubentude.
Estas jornadas tenien cumo propósito comemorar l die de l Associatibismo i l die de la Ouropa, bien cumo atribuir l Prémio de Mérito Associatibo Jubenil de la Region Norte.
Para l prémio, fui scolhida an cada çtrito de la region norte ua associaçon jubenil que durante l anho de 2008 se çtinguiu pulas sues buonas práticas ne l apoio al moços i a la quemunidade. Ne l çtrito de Bergáncia la ARJM fui la nomeada, i tal cumo las associaçones de l outros çtritos rializou ua apersentaçon, adonde mostrou l trabalho rializado al lhargo de 2008.
Passadas las apersentaçones ls júris reuniran, i decidiran repartir l prémio pulas 5 associaçones, bisto cada ua tener fines çtintos, sendo defícel fazer ua abaluaçon cumparatiba.
La direçon de la ARJM recebiu esta çtinçon cun sastifaçon, i agradeciu an nome de ls sous sócios a todos aqueilhes que la apoiórun na prossecuaçon de ls sous oujetibos.
La ARJM lamenta, inda assi, que este recoinecimiento a nible regional, nun acunteça al nible lhocal, adonde l ampato de l sou trabalho ye mais bisible.

10º Festival Intercéltico de Sendim, 31 de Julho al 1 de Agosto.

L "Festival Intercéltico de Sendim" que astanho bai festeijar la sue 10ª ediçon, antre ls dies 31 de Julho i 1 d'Agosto, yá ten cartaç i ye de ls buonos. Ne l purmeiro die, ls "Lenga Lenga" de Sendin i "Maria Salgado" ban abrir la fiesta que ancerrará cul sonido de ls suecos "Hedningarna" (retrato) que pula 2ª beç tornan al festibal. Die 1, "Korrontzi" ua de las bandas cun más feturo ne l folk ouropeu, i la spriente "Brigada Victor Jara" i "Llan de Cubel" de las Astúrias "ancerran la fiesta.

L festibal cunta tamien cun atebidades durante l die.

Mais anformaçones:

http://www.intercelticosendim.com/

NOIDZ - Root Sounds from the earth

"Root Sounds from the earth", ye la cançon de ls NOIDZ ua banda de metal i música sprimental de l spácio. Ten cumo tocadores ZORK, MONKKA, DR.ZEE, ZDION i LUNATTIKA i ua de las sues modas ten tamien la gaita cun "Repasseado de Rio D'Onor".

Torneio de las Geraçones 2009.

Fui feito ne l passado sábado, die 11 de Abril, ne l Cumplexo Çportibo de la Terronha, l 3º Torneio de las Geraçones de Miranda de l Douro. L torneio fui ourganizado astanho puls mardomos Vitor Ribeiro, Ricardo Rocha i Toni Igreja i cuntou cula colaboraçon de la ARJM-Associaçon Recreatiba de la Jubentude Mirandesa.

Astanho chegórun a la final las geraçones de 1982 i 1983, i la ganhadora fui la geraçon de 1983. Partecipórun tamien las geraçones de 1980, 81, 84, 85, 86, 88 i 89.

Pula nuite fizo-se ua cena cumbíbio antre to la mocidade mirandesa. Neilha fui feita l'antrega de to ls galardones i nomeados ls próssimos mardomos de l torneio: Emanuel, Nelsito i Julinho. Assi s'ancerrórun las Bacanças Çportibas 2009. Parabienes a to ls partecipantes!

Agarra-me estes Palos, puis...

SER MIRANDÉS YE SEXY!

Botaçon...

L "3º Torneio de las Geraçones de Miranda de l Douro" yá stá a arrimar-se, i las geraçones ampeçan an segredo a purparar-se para l más caliente torneio de la bola de la nuossa cidade. Tal cumo Deco, Di Maria, Cristiano Ronaldo, Figo ó mismo José Mourinho, las eiquipas i sous capitans yá stan a dies d'antrar ne l stágio que ls puode lhebar a la bitória nel próssimo die 11 de l més de la páscoa.

Agora yá pudeis botar naqueilha eiquipa que bós pensais star an melhores condiçones!

Agarra-me estes Palos!

Ne l Torneio de las Geraçones!

Eilhes ténen que medrar antre lhaços i pingachos!

Hai rapazicos i rapazicas que an Miranda ampeçan agora a beilar, a tomar gusto por beilar, i eilhes quieren medrar a beilar. Son eilhes las froles de l baile na nuossa tierra, son eilhes l feturo de ls pingachos, binte cincos i Padre Antonhos. Por esso dezir a un destes moços que sta spulso de l baile (que nun ye nada más que la prática dua tradiçon), ye l mismo que matar l feturo de la tradiçon, ye l mismo que matar la frole más guapa que medra ne l praino. I esso nun puode acuntecer nunca más, nien an Miranda, nien ne l praino, nien an nanhue lhugar de l mundo adonde ninos quérgan daprender ua tradiçon!

Ye papel de ls mais bielhos correjir l que un nino faga de malo, castiga-lo para que el daprenda que nunca más puode tornar a fazer cousas malas. Ye papel de ls mais bielhos amanharen l lhugar para ls ninos beilaren, las fatiotas, las atuaçones, ye funçon de ls mais bielhos assi ourganiza-los. Nun ye papel de ls mais bielhos spulsá-los dua cousa que tanto gusto lhes dá, nun ye papel de ls más bielhos matar las mais guapas froles que medran antre lhaços i pingachos.

A quien lo fizo i speramos que nunca más l faga solo se puode dezir que muito ten que daprender cun to las personas que perserbórun las danças tradecionales de las Tierras de Miranda anté als nuossos dies.

Agarra-me estes palos!

Quinteto Reis 84 - Cuncerto 25 Anhos. Die 11 de Abril, pulas 22h00, ne l Anfitriato de l Riu Fresno.

L Quinteto Reis 84 ye un grupo de musica tradicional mirandesa i pertuesa, feito an Miranda de l Douro an 1984. Mas l quinteto, nun ye un grupo de musica tradecional cumo outro qualquier, ye arriba de todo un grupo que, al lhongo destes redadeiros 25 anhos, cunseguiu ajuntar bielhos amigos an torno dun oujetibo quemun: perserbar alguas de las más guapas musicas tradicionales de l nuosso Pertual.

Zde la sue criaçon más dua bintena i meia de musiqueiros fazirun parte desta fascinante formaçon musical, ls quales se eiran ajuntar outra beç para un grande spetáclo de comemoraçon de ls 25 anhos de carreira, ne l próssimo die 11 de Abril, pulas 22h00, ne l Anfitriato de l Riu Fresno, an Miranda de l Douro.

Ne l spetáclo bai haber inda atuaçones d'artistas cumbidados, ls Pauliteiros de la Cidade de Miranda de l Douro i ls Galandun Galundaina.

Agarra-me estes Palos!

Ls crocodilhos! Adonde? Eilhi ban dous!

Mius amigos hoije quien quejir ir banhar-se al Riu Douro nun bai tener nanhue surpresa mismo ambaixo de las sous piernas. Podeis ir alhá baixo al riu tomar un banhico daqueilhes balientes, se bien que l'auga de l riu, grácias al paiç bezino, tamien nun ye de las melhores i l tiempo puode tamien inda nun star pra esso, mas crocodilhos nun hai nin un.

You nun sei porque, mas esta ye mais ua daqueilhas nuobas que ls nuossos armanos tanto gusto lhes dá poner por ende. Eilhes yá ambentórun stórias de queluobras, desta beç fui crocodilhos, mas ls pauliteiros de la buossa tierra nun bos deixan star mais tiempo anganhados.

L senhale stá alhá porque l duonho de l barco de l passeio ambiental nun quier que las personas se banhen alhá. Solo por esso.

Nun fui la cámera quien puso l senhale, nin sequiera sabie de l senhale i tamien nun hai nuobas de crocodilhos zaparcidos an Spanha. Todo nun passa de mais ua anzonice de l nuobas "La Opinion de Zamora".

La Cámera Munecipal ten ye que poner alhá ua placa na puonte de la barraige a dezir "Peligro jornalista spanhol - Nun bos arrimeis!"

Mas mais ua beç eiqui queda la pregunta que muitos de ls bezitantes i mismo ls mirandeses que miran l riu i solo áchan xardas i bogas, gustarian de fazer als jornalistas deste nuobas:

Eilhes andan por ende...

I quantos son?