GEADA 2008 - Bamos derretir l gelo!

Yá stá çponible l porgrama de l "GEADA 20008 - I Festibal de Cultura Tradecional de las Tierras de Miranda" an:

http://festivalgeada.blogspot.com

26 - L'Andecha Turcipié (Astúrias) + Quinteto Reis

27- Pauliteiros de Miranda de l Douro + Roncos do Diabo + Galandum Galundaina + Tuttis Cattraputtis + La Charanga de Zeek i Trasgo

28- Passeio "Na Rota de Vasconcelos" + Gueiteiricos + L'Bombo

BAMOS DERRETIR L GELO!

Lérias Associaçon

Naciu ua nuoba associaçon nel praino, de sou nome "Lérias Associação Cultural".

La Lérias ten sede an Palaçuolo i ye ua associaçon cultural que ten cumo oujetibo la promoçon sócio-cultural i l zambolbimiento de la cultura tradecional.

La Lérias ten ourganizado ya alguas atebidades pul praino, i ne l die 21 de Nobembre, bai cuntinar esse trabalho cun la apersentaçon de mais ua Sexta - Cultural, ne l Bar de la Associaçon Recreatiba d ' Atanor.

Lheba l tou strumiento i ajunta-te a la ruodra.

Se quieres saber mais besita: http://leriasassociacao.blogspot.com/

Dildeiros de Miranda ne l 1º Salon Folcloerótico de Lisboua?!

Magosto de la ARJM

Ne l próssimo die 15 de Nobembre, an Miranda do Douro, la Associaçon Recreatiba de la Jubentude Mirandesa, bai fazer l tradecional magosto. L porgrama ye l que sigue:

15/11/2008 - Sábado

11h00 - Ancuontro de ls partecipantes nel "Banco".

12h00 - Almuorço

13h00 - Magosto

14h00 - Paintball

17h00 - Scanço pra merendar.

Preçio:

Sócios - 10€

Nun sócios - 15€

Anscriçon: Ambia ua sms screbindo MAGUSTO seguido de l tou nome pra l nº 933340545. La paga ye feita ne l die de l Magosto.

Barack Obama demuda la quelor de la storia...

Onte, Barack Obama, fui eileito l purmeiro persidente negro de ls Stados Ounidos de la América. I deiqui pra lantre la stória bai demudar de quelor...

Bin Laden?

Eiraque?

Afeganiston?

Iron?

Guantánamo?

La crise anternational?

Obama cumo Kenedy ye l simbolo de la sperança...

I la mudança bai chegar a la América i al mundo?

Apuis de "Ls Lusíadas" quien sabe se nun será Hamlet...

Amadeu Ferreira, un de ls maiores storiadores, scritores, ambersadores, çfensores i muitas cousas terminadas an "ores", de la lhéngua mirandesa frimou, nua anterbista ne l "Diario de Noticias", traduzir un die l'obra triatal Hamlet, de William Shakespeare.

Apuis de la traduçon de Ls Lusíadas, l pursor nun pára de nos deixar surpresos.

Bien haiades, Pursor Amadeu!

Retrato: Diário de Notícias

"Arte de Roubar", de Leonel Vieira

"Arte de Roubar" ye l nome de l nuobo filme de l mirandés Leonel Vieira. L filme ten la partecipaçon d'atores cumo Ivo Canelas, Enrique Arce, Nicolau Breyner, Soraia Chaves, Flora Martinez i Magui Mira.

L filme cunta la storia de dous amigos roubadores: Chico (Ivo Canelas), ye un roubador zafertunado i eimigrante pertués; Fuentes (Enrique Arce) ye Porto-Riqueinho. Ls dous biben ne ls Stados Ounidos mas deciden benir pula Ouropa a percura de l roubo purfeito...

Ne ls cinemas a 6 de Nobembre.

L hi5 yá stá an mirandés!

Diç que la lhéngua mirandesa stá cada beç mais biba. I you bos digo que nun ye aldrabonice. Hai sinales que muito sta a mudar.

L mirandés stá a perder l miedo, i nós, la mocidade stamos tamien als poucos a perder l miedo d'ampeçar a trabalhar pula nuossa lhéngua mai. Hoije, yá nun son solo ls mais bielhos a cuidar de la nuossa lhéngua. Agora hai tamien giente nuoba, hai giente que ampeça a tomar la einiciatiba de screbir, de fazer traduçones, pra poner l maior númaro de personas an cuntato cun la lhéngua. Mais un eisemplo, ye la traduçon de l çitio de l'anternet, hi5.

L hi5 yá stá çponible an Mirandés. Ye scuolher la lhéngua ne l mundo ne l canto dreito de l hi5 ó porqui:

http://www.hi5.com/friend/account/displayEditAcct.do

ó tamien porqui:
http://hi5.com/friend/account/editAccountLocale.do?defaultLanguage=mw_PT

La mocidade mirandesa fui bendimar.

Nel passado die 11 de Outubre, la mocidade de Miranda de l Douro fui bendimar a la Freixenosa. La bendima fui ourganizada pula Associaçon Recreatiba de la Jubentude Mirandesa i cuntou cun la persencia de 30 partecipantes.

Mas l die nun fui solo de bendima, durante esta atebidade fizo-se tamien un passeio a pie pulas arribas, jogos tradecionales, un jantar cumbíbio i baile cun gueiteiros.

L resultado de la bendima, l bino, será apersentado ne l "I Festibal de Cultura Tradecional de Tierras de Miranda - GEADA 2008". Benie al festibal i porbai l bino de la mocidade.

L' Agarra-me estes Palos nun fui a la bendima, mas tien ls retratos pra bos amostrar que la mocidade mirandesa sta unida pra çfender todas las nuossas tradiçones.

Agarra-me estes Palos,

Pulas nuossas tradiçones!

La nuossa tradiçon mais ua beç na tb...

Nos nun stamos eiquei a dar baile a naide...

Mas tenemos muito ourgulho de ber la nuossa tradiçon mais ua beç ser apersentada na telbison..

Agarra-me estes Palos!

L Pingacho de la Trafaria... You gustei i bós?

La música tradecional ten destas cousas. Giente de todas las eidades, de todas las ouriges, de todas las quelores a beilar ls mismos sonidos i a reambentar la música tradecional, la música de l puobo, la música de todos nós.

ORGULHO AN SER MIRANDÉS!

GEADA 2008 - 26 a 28 de Dezembro.

• L purmeiro "Festibal de Cultura Tradecional de las Tierras de Miranda - GEADA 2008" ye ourganisado, pul Grupo de Pauliteiros de Miranda do Douro, pur l sou 3º anibersário, i pula Associaçon Recreatiba de la Jubentude Mirandesa.Cun l festibal pretende-se trazer, durante ls dies 26, 27 i 28 de Dezembro, a las Tierras de Miranda ls sonidos i las tradiçones d'ambierno de l passado, nun Eco-Festibal, i dá-los a coinecer a un público çtante de ls grandes mobimientos culturales.
  Durante l festibal, haberá cunciertos, workshops de dança tradecional, pauliteiros, pequeinhas precursones i fumeiro, matáncia, palhestras an lhéngua mirandesa, ua besita al "Centro de Interpretação Turístico-Ambiental de Miranda do Douro" i l "Passeio a Pie - Na Rota de Vasconcelos".
  L porgrama será publicado an brebe eiqui i ne l blogue de l GEADA 2008.

Pré-anscriçones an pauliteiros@gmail.com.

BAMOS DERRETIR L GELO!

• O 1º "Festival de Cultura Tradicional de Terras de Miranda - GEADA 2008" é organizado, em parceria, pelo Grupo de Pauliteiros de Miranda do Douro, por ocasião do seu 3º aniversário, e a Associação Recreativa da Juventude Mirandesa.Com este festival pretende-se trazer às Terras de Miranda os sons e as tradições de inverno dos nossos antepassados e dá-los a conhecer a um público que pela sua situação geográfica se encontra longe dos grandes movimentos culturais.Durante o festival, além dos concertos, haverá workshops de dança tradicional, pauliteiros, pequenas percursões e fumeiro, matança, palestras em língua mirandesa, e uma visita ao ""Centro de Interpretação Turístico-Ambiental de Miranda do Douro" e o "Passeio Pedestre - Na Rota de Vasconcelos".O programa será publicado brevemente no blogue doGEADA 2008 e em http://agarramestespalos.blogspot.com e em http://arjm.blogspot.com.

Pré-inscrições em pauliteiros@gmail.com.

VAMOS DERRETER O GELO!

BAMOS DERRETIR L GELO!

Ls nuossos Lusíadas.

Quatro anhos i nuobe meses apuis de haber ampeçado la traduçon de la eipopeia de Luís Vaz de Camões, "Os Lusíadas", Francisco Niebro, l pseudónimo de l pursor Amadeu Ferreira, dou por terminada la traduçon mais amportante de la stória de la lhéngua mirandesa. "Ls Lusíadas" ya nun son solo território pertues, hoije son tamien território mirandés.
Fúrun quaije cinco anhos de dedicaçon de l pursor al mirandés. Durante estes anhos publicou todas las semanas ne l Jornal Nordeste, cinco stáncias de la eipopeia an mirandés.
Agora acabada la traduçon, seran publicados drento de un anho "Ls Lusíadas" an lhibro. An brebe tamien será publicada la traduçon de ls "Lusíadas" an Banda Desenhada.

Que Dius bos lo pague Pursor Amadeu!

Politicos de Miranda... i la gaita i la çanfona... i l... i la...

La blogosfera mirandesa stá a gerar controbersia i todo porque ne ls ultimos tiempos aparecirun pula anternet blogues cun temas que nun agradan a toda la giente. Uns falan de temas de l bota abaixo, outros de sexo, antre outros.
Mas hai dous an que las çcussones stan bien calientes i por esso ye tiempo de falar deilhes.
Por eisemplo, fai poucos dies apareciu pur ende un blogue que quier fazer las pessonas çcutir sobre ls nuobos politicos de Miranda. L blogue ten l nome de Políticos de Miranda. Segundo, l blogger, ua pessona anonima, l oujetibo de l blogue ye çcutir la purparaçon de ls partidos pa las prossimas eileiçones pula camara, bien cumo las sues eiquipas, stratégias i mensaiges. Mas zde de que apareciu, l blogue solo ten criado un clima de suspeiçon i las çcuçones nun son nien sequiera custrutibas pa la nuossa tierra. L único i mortal porblema daqueste blogue ye que las pessonas nun çcuten l feturo de la nuossa tierra, nun çcuten las eideias, nien ls porjetos de ls candidatos coinecidos. Las pessonas ne l blogue Políticos de Miranda ampeçoran, pur orientaçon de l bloguer, a çcutir solo ls candidatos, l que nunca pode ser l camino pula eiboluçon democrática de las Tierras de Miranda.
Mas l que mais cuntrobersia criou ne ls ultimos tiempos fui mismo l Gaita i la Çanfona. Nel einício la sue tematica, l SEXO, i la sue lhenguaige, muito çfrente de la que la giente stá aquestumada de ler an mirandés, fizo cun que la maiorie de las pessonas çcutissen se la criaçon de l blogue serie ou nó ua buona eideia. Mas porque nó? Apesar de la palabra SEXO ser un tabu pa la maiorie de ls mais bielhos, l SEXO tamien puode ser tema de la lhiteratura bloguista Mirandesa... Se la ciéncia, las tradiçones, l tiempo, l ambiente, las streilhas, ls trabiessos de ls nuossos políticos, las berças de las nuossas abós son temas de la lhiteratura mirandesa porque nó l SEXO?...
Apuis de tanta scrita, ua concluson hai para retener cun estes nuobos blogues, antre outros. Todos eilhes pouco a pouco nos mostran, a aqueilhes que por eiqui andan fai mais tiempo, que l'anternete afinal ye mismo un meio d'arribar a las pessonas i que puode muito bien ser la arma pra cumbater l'anterioridade, la falta de ouportunidades i l anstrumiento pra çcutir ls porblemas de la nuossa tierra.

Pula anternete pudemos çcutir política zde que haba regras criadas por ua quemunidade, i pula anternet pudemos screbir l que quejirmos na lhéngua de todos nós. Mas nós, ls bloguers i ls leitores mirandeses tenemos, tamien, que tener concéncia que l'anternete ye apenas l camino pra atingir ls oujetibos de zambolbimiento traçado pra la nuossa tierra na bida real, puis l'anternete ainda nun fai milagres...

Nun stá fácele parir l IC5.

La IC5 puode ser la strada que traga l tan pormetido zambolbimiento pula nuossa tierra, mas tamien ye la obra que mais tarda an chegar. Pra nós, mirandeses, ya era mais que tiempo de la obra ampeçar...

I agora l que se passa?!...

Segundo ls jornales, la nuoba strada ya stá outra beç ancrabada porque ls bancos nun quieren amprestar al stado l denheiro pra fazer la obra...Mas será que até l stado sta assi tan mal que ya naide l'ampresta denheiro??

Pertual, Pertual,
de l que ye que stás à spera?
Tenes un pie nua galera,
i l outro nel fundo de l mar....

Jorge Palma

L persidente de la Republica besita Miranda.

Hoije i manhana l Persidente de la República bai besitar la nuossa cidade.

Durante estes dous dies Cavaco Silva bai passear pulas arribas de l douro i tamien einaugurar alguas obras cumo por eisemplo las obras d'ampliaçon de l Lar de ls Bielhos.

Speremos que las pessonas que tien l puder na nuossa tierra, nun se squeçan de mostrar las cousas buonas, mas tamien las cousas que percisamos. Ye ua buona ouportunidade de puder fazer oubir la boç de la nuossa tierra.

Ye facil... Sr. Persidente Miranda percisa de... ounibersidade, ambestimiento andustrial... etc... etc...

Miranda - Capital de l moble i de la decoraçon de l Nordeste Trasmuntano

Miranda de l Douro, la cidade de ls farapos, sta a mudar. La farapela sta a dar lhugar pouco a pouco a l mobliario. La andustrie de ls mobles ambadiu la nuossa tierra. Miranda yê hoije la nuoba "Capital de l Moble i de la Decoraçon de l Nordeste Trasmuntano".
Agora hai que aprobeitar las nuobas riquezas que esta andustrie puode trazer pulas Tierras de Miranda. Muito se puode fazer pra zambolber de ua forma sustentada la andustrie de ls mobles. I esse trabalho ten que ampeçar zde agora.
La Associaçon Comercial ya apersentou ua nuoba feira, la EXPO MOBLE. Cun esta feira bai-se puder oufecializar l eipipeto de capital de l moble i bai-se puder ajuntar fabricantes i rebendedores pra traçar la nuoba stratégie comercial de la cidade.
Mas tenemos que fazer mais, muito mais. Esta puode ser ua buona ouportunidade pra se fazer ua germinaçon andustrial i comercial cula maior capital de l moble, Paços de Ferreira. Tornar las dues cidades armanas ten que ser ua de las prioridades de quien ten l mando na nuossa cidade.
Outra de las posseblidades de ambestimiento puode passar pula criaçon de ua nuoba zona andustrial an Miranda. Eilha deberie de ser ampelmientada cumo se faç noutras tierras dalha baixo, cun terrenos a custo zero. Puis ye la unica maneira de se cunseguir atrair ambestimiento pulas regiones menos zambolbidas. Ua nuoba zona andustrial ten que cuntar tamien cul stribo de las associaçones de andustriales de Paços de Ferreira i culs comerciantes de alhá que ya stan eiqui an Miranda, puis sin eilhes i sin l sou stribo nada se puode fazer.

I la criaçon del "MOBLE PARK" (ua spécie de "Rental Park" de l Moble) nun serie ua buona eideia?

Cumo diç un cachico del hino de la nuossa cidade: "Miranda pátria de soldados" yê tiempo de ganhar la guerra de l zambolbimiento....

Miranda de l Douro

Capital de Moble i de la Decoraçon

Miranda do Douro

Capital do Móvel e da Decoração

Pauliteiros vs Pauliteiros

Ls Pauliteiros de Miranda stan an guerra culs proprios Pauliteiros de Miranda. Diç que la guerra fui causada por ua zgraciada falta de roupa (Anquanto nel resto de l mundo eilhes se baten pul petrolio / gaç , nos eiqui somos mais modestos i batemos-mos pula roupa cuntrafeita que se bende nas rues de la nuossa tierra). Cumo se puode ber nel retrato la façon terrorista "25BOK" de ls pauliteiros de Miranda barricou-se apuis de eifeituar un tremiendo atentado. Diç que furan roubadas i stendidas a seco quaisque quatro t-shirts, dous calçones i mais ua carteira.
Pul outro lhado, la façon mais dormenhona ls "5BOKYEMTO" de ls pauliteiros de Miranda biu-se znuda i ancapaç de cuntratacar.
Apuis de muitas negociaçones i de la antrebençon de la ONU, la façon terrorista decidiu antregar ls sous refens.Nel retrato pudeis ber Al Moahmed Chimpaoé, un de ls comandantes de la façon a tratar de la deboluçon de ls refens.

Fiestas de Santa Bárbela...

Astanho las fiestas de Santa Bárbela, las fiestas de la cidade de Miranda de l Douro, stubiran muito abaixo de l que todos asprabamos. Toda la giente diç que las pessonas nun dan denheiro pra las fiestas de la nuossa cidade, critican ls mardomos, critican estes i aqueilhes, mas naide apersenta ua resoluçon duradora pal porblema. Muitas son las soluçones, muitas son las oupeniones. Por esso nos eiqui bamos a deixar mais ua i que se calha ye aqueilha que a mais giente l bai a gustar.

Todos sabemos que la mardomie, formada por homes casados i rapazas solteiras, nun ten trabalhado bien anho trás d’anho, apesar de l sforço de uns quantos. Assi ua posseblidade de salbaçon de las fiestas bien coinecida por todos ye la de la "ouficializaçon" de las fiestas de Miranda.

An outra fala, la ourganizaçon de todas las atebidades religiosas serie de la responsabilidade de la mardomie, i las atebidades paganas passarie pra ua plataforma d'antendimento antre l'associaçon comercial i la cámara. Puis esses uorganos si tenen giente capaç de poner a lhabrar ua maquina que se quier buona pra fazer uas fiestas cumo la nuossa cidade bien merece.

Esta oupenion pude parecer benida daqueilhas pessonas que gustan de tener todo feito, mas nun ye. Esta oupenion ye baseada nua fuorte crença que uas fiestas de la cidade son la eimaige de todo al cunceilho. C’uas buonas fiestas atrai-se giente a la tierra. Se beniren eiqui ls xutos, ls The Gift, l Tony Carreira, i outros cumo estes todos ls anhos, habera quien besite la nuossa tierra, habera giente que benera sentir la fuorça dun cunceilho que ten outra atratebidade que astanho perdiu...Mirandeses i Mirandesas ye tiempo de tomar decisones i apuntar l nuobo camino... Assi esto nun pude cuntinar!

Agarra-me estes Palos,

Pulas fiestas de la Cidade de Miranda de l Douro!

An Brebe...
Nuobas muito stranhas de la actuaçon de l passado fin de semana an Santa Cruz, Torres Vedras...