Uxu Kalhus, Transumâncias Groove.

Hay nuoba musica ne l Agarra-me estes Palos. Eilhes nun son de las Tierras de Miranda, mas chaman-se Uxu Kalhus i cantan la boç de l nuosso puobo.

"Uxu Kalhus son ua fuorça de la natureza, fázen parte del mobimiento de l Nuobo Baile Pertués (NBP). "L nuobo CD "Transumâncias Groove" recupera ls bailes d'antanho, cumo l Bira, las Saias, la Balsa, la Carbalhesa, la Saia de la Carolina i l Corridinho; antegra bailes de l folc ouropeu, cumo l Círclo, la Chapalloise i la Neo-Mazurca i ye inda cumpletado cun bailes de Cabo Berde i Eitália.
L baile, fuonte de anspiraçon pula anarquie ourganizada de l "Transumâncias Groove", reinbenta-se, transpondo frunteiras regionales que, possiblemente, nunca eisistiran."

Uxu Kalhus boltan a reafirmar l dreito

a la outodeterminaçon de l Folc Pertués!"

http://www.uxukalhus.net/

Fuonte:uxukalhus.net

Retrato: André Brandao

AGARRA-ME ESTES PALOS!

Ls Sabores Mirandeses 09.

Fui de 20 a 23 de Febreiro que se fizo, an Miranda de l Douro, l "X Festibal de ls Sabores Mirandeses." Astanho l festibal yá stubo mais baliente, arrimado a 10 mil personas passorún pul pabilhon multiusos para saborear ls nuossos sabores i ber las nuossas tradiçones. Nós tamien fumos alhá a beilar i passar un cachico de tiempo de l nuosso antruido. Eiqui quedan algus retratos:

Anté l "Sapico Concho" stubo alhá!...

Mais retratos eiqui.

AGARRA-ME ESTES PALOS!

Festibal de ls Sabores Mirandeses, 20 a 23 de Febreiro.

L Festibal de Sabores Mirandeses ye...

Música,

sposiçones,

arruadas,

jogos tradicionales,

besitas al cientro stórico,

oufecinas d'anstrumentos musicales

i lhéngua mirandesa,

artesanato,

mercado de produtos regionales,

passeios BTT,

montaries

i la melhor gastronomie.

Die 20 - Einauguraçon

Porgrama "Portugal em Directo" de la RTP

Grupo Folclórico Mirandés de Dous Eigreijas

Gueiteiros de Cunstantin

Pauliteiros

Cuncierto -Banda Filarmónica de Miranda de l Douro

Die 21 - Die de l Canhono

Montarie

Pauliteiricos de la Mirandanças,

Caramonico i Paradela

Cuncierto - La Çaramontaina

Die 22 - Die de l Bobino de Raça Mirandesa

Montarie

5º Passeio BTT “ Por este praino afuora”

Pauliteiros de Sendin i Dues Eigreijas,

Pauliteiricas i Danças Mistas da Mirandanças,

Cuncierto - Pica Tumilho

Die 23 - Die de l Cuchino

Pauliteiros Mirandanças,

Danças de l Cientro Cultural de Sendin

16h00 - PAULITEIROS DE LA CIDADE

DE MIRANDA DE L DOURO

Mais anformaçones:

Cámara Munecipal de Miranda de l Douro

Pica Tumilho - Cuncierto 10 anhos!

Ne l die 22 de Febreiro, pulas 21h00, ls Pica tumilho, la Agrícola Rock Band, ban fazer la fiesta de ls sous 10 anhos, nel Pabilhon Multiusos de Miranda de l Douro.

10 Anhos d'oufecialidade de l Mirandés - Reportaige Cumpleta LocalVisao TV

Rui de Mascarenhas - Pauliteiros de l Douro.

Rui de Mascarenhas, nome d'artista de Rui de Pinho Ferreira, fui l home por trás dua boç tan guapa i tan fuorte que na década de 50 ancantou Pertual cun la cançon popular "Pauliteiros do Douro".

Este artista, streilha squecida mismo ne l sou tiempo, nacido an (1929?), na Bila Perry, an Moçanbique, atuou un cachico por to l mundo, Stados Ounidos, Canadá, Brasil, Anglaterra, Bélgica, Rodésia, Eigipto i fui anté l segundo artista pertués a chubir al strado de l Oulympia de Paris, lhougo apuis de la eimortal Amália Rodrigues. Na sou carreira fui ajutando galardones cumo l Prémio d'anterpretaçon de l'Emissora Nacional, medalha d'ouro an Cannes i ne l Festibal de la Costa Berde an Spanha.

Rui de Mascarenhas morreu an 1987, ne l Porto, loinge de la bida de streilha i de l mundo de la música. Mas pra siempre quedou eimortalizada la sue boç an "Eu vou a Miranda ver os Pauliteiros, ver os Pauliteiros eu vou a Miranda"

"Pauliteiros de l Douro"

L camboio bai a chubir la sierra

parece que bai, mas nun bai caer.

Siempre assobiar bai de tierra an tierra.

Cumo a preguntar adonde you quiero ir.

You bou a miranda

Ber ls pauliteiros

Ber ls pauliteiros

You bou a miranda

L riu : ben de Trás-ls-Montes

L Douro: ben de aí tamien

L riu: ben de alhá i nun cuntes

Al aire nin a mie mai.

L camboio bai a chubir la sierra

parece que bai, mas nun bai parar.

Siempre a silbar bai de sierra an sierra

Siempre you quiero ber se el bai chegar

L camboio bai a chubir la sierra

parece que bai, más nun bai caer.

Siempre a silbar bai de tierra an tierra.

Cumo a preguntar adonde you quiero ir.

Música i lhetra: Música popular de la Beira Alta

Traduçon: Fernando Silva

EMAX.

Fui ne ls die 7 i 8 de febreiro que algus moços de Miranda stubírun, nas tierras de Santiago de Compostela, ne l 3º Ancuontro Mostra Associtiba Jubenil - EMAX.

Fui an fiesta i cun muita animaçon que decorreu l ancuontro. Moços pertueses i galhegos amostrórun l que melhor se fai nas sues tierras. Grupos de matrafonas, ranchos, bombos, dança de l bentre i hip-hop, animórun la mostra.

Miranda de l Douro fui repersentada pula ARJM - Associação Recreatiba de la Mocidade Mirandesa i ls Pauliteiros beilórun para to la giente ber que la nuossa cultura i las nuossas tradiçones stan bibas i que l trabalho pra las çfender continue a ser feito.

Retratos de l ancuontro stán eiqui.

Solo eiqui pra nós...
Agarra-me estes Palos,

Cun sigurança!

Pauliteiros de Miranda i l'ARJM ne l EMAX.

La Associaçon Recreatiba de la Mocidade Mirandesa - ARJM - i ls Pauliteiros de Miranda de l Douro, ban star ne ls próssimos dies 7 i 8 de febreiro, an Santiago de Compostela, na 3ª ediçon de l "Ancuontro Mostra Associatiba Jubenil de la Galiza i Norte de Pertual - EMAX".

Estes ancuontros ténen l oujetibo de crear un spaçio pra cumpartir realidades, spriéncias, porblemas i soluçones quemuns ne l mundo associatibo i reduzir las çtancias antre realidades muito eiguales i próssimas.

La Mostra cunta cun sposiçones, seminairos, spaçios d'atuaçones para grupos, spaçio multimédia i ne l redadeiro die un cuncerto cun muita animaçon.

Miranda bai star bien repersentada i nos, la ARJM i ls Pauliteiros de Miranda, pormetemos amostar l melhor de la nuossa tierra i muita animaçon.

AGARRA-MES ESTES PALOS!

Daprender mirandés cun Byki.

Byki, ye l nome de la mais nuoba ferramienta de l'anternet que ansina las personas a falar la lhéngua mirandesa. La byki, de l'outorie de l'ampresa "Transparent Language", cunta cun mais de 3,5 milhones de clientes ne l mundo anteiro, antre gobiernos, scuolas, anstitutos cumo la NASA i outras organizaçones i ten tamien çponibles 70 lhénguas para daprender.
Por todo esto, la Byki ye ua de las melhores i mais outelizadas ferramientas pula daprendizaige de lhénguas an to l mundo i stá agora tamien çponible para que milhones de personas daprendan la nuossa lhéngua.

Eiqui Byki ANGLÉS-MIRANDÉS!
Here Byki ENGLISH-MIRANDESE!

Zancanta l tou cielo an mirandés!

Ne l Anho Anternacional de la Astronomie, ls Museus de la Ciéncia de las Ounibersidades de Coimbra i de Lisboua i l Centro Ciéncia Biba de Custáncia, an parcerie cula Critical Software i cul apoio de l Público on-line, stan a pormober l cuncurso "ZANCANTA L TOU CIELO" para ls alunos de l ansino básico de to l paíç.

Cun l cuncurso quier-se que ls moços custruan nuobas cunstelaçones i zambolban stórias cun eilhas, zde las streilhas de quatro zonas selecionadas de l cielo.
Puoden participar eiquipas de 5 a 20 alunos de qualquier un de ls trés nibles de l'ansino básico, sob la tutela de pul menos un porsor. Las anscriçones stan abiertas anté al die 21 de Márcio de 2009, i ls trabalhos puoden ser ambiados anté l die 21 de Júnio de 2009. Ls melhores trabalhos de cada scalon (1º, 2º i 3º ciclos de l ansino básico) seran premiados i publicados, durante l anho de 2009.
Este cuncurso cunta cun ua nuoba que l çtingue de todos ls outros ye que ls trabalhos puoden ser antregues an mirandés, zde que acumpanhados de la traduçon an pertués.

Bien haia l'ourganizaçon!

Dieç anhos de Lhéngua Mirandesa.

Ne l passado die 29 de Janeiro, l mirandés fizo dieç anhos cumo lhéngua oufecial de Pertual. La quemunicaçon social deu çtaque cumo yá fai muito tiempo nun dában a la nuossa lhéngua. Eiqui quedan alguas reportaiges:

Local Visão TV



Portugal em Directo



Agarra-me estes Palos
Pula nuossa lhéngua!

La nuossa salude.

Fui assinado, nel passado die 22 de Janeiro, na Cimeira-Eibérica, un acuordo de coperaçon sanitária, antre Pertual i Spanha, pra facelitar l'outelizaçon pulas populaçones frunteiriças de ls eiquipamentos de salude de ls dous lhados de la frunteira.

Zde que fui assinado muitas ténen sido las reaçones pulas Tierras de Miranda. Jacinta Fernandes, del Centro de Salude de Miranda de l Douro dixe, an declaraçones al "Diário de Notícias", que l acuordo "poderá lhebar Pertual a quedar de braços cruzados an beç de amplementar medidas pra prender ls médicos ne l anterior raiano". La misma dixe ainda que "l spital de Zamora yá ten alguns cuidados, mas ua ouferta cumpleta solo eisiste an Salamanca, que stá a la miesma çtáncia de Bergança". La médica acusa inda l goberno de l zaprobeitamento de ls fondos quemunitários pul melhoramiento de ls cuidados de salude. "Ls spanhóis yá amplementórun la telemedicina anquanto nós an seis anhos solo cunseguimos tener la radiologie a funcionar. I mismo assi cun falhas".

Yá l persidente de la cámara munecipal, Manuel Rodrigo, dixe a la "Lusa" que spera que l acuordo dé respuosta a ua bielha reibindicaçon de ls cidadones de l nuosso cunceilho, que queda a menos de 40 Km de Zamora. L persidente apunta l eisemplo de ls ABC, ls acidentes basculares cerebrales, an que la respuosta rápida puode fazer to la çfrençia pula bítima.

Las oupinipones cumo se puode ber son muito çfrientes, mais deilhas pudemos retener dous cousas: cun l acuordo las condiçones d'atendimiento de ls nuossos doentes bon melhorar, mas por outro lhado las nuossas gientes corren l risco de ser squecidas, pul gobierno central, ne l que respeita a la melhorie de ls serbícios de salude ne l cunceilho de Miranda. Por esso nel feturo ls nuossos "políticos", ls políticos de miranda, ténen que ser capazes de dar la cara pul nuosso pobo, lhutando por nós quando fur perciso i nun quedando drento dua toca sperando que la tormenta se çfaça i se percan más serbícios.

Agarra-me estes Palos

Pula nuossa salude!

Pauliteiros de Miranda al bibo na RTP.

Die 30 de Janeiro, pulas 22h00

Pauliteiros de Miranda de l Douro,
al bibo ne l porgrama "Dança na Praça" de la RTP.

Morreu João Aguardela.

Morreu ne l passado die 19 de Janeiro, l grande músico pertues João Aguardela.

L músico, de ls SITIADOS, i de ls porjetos la NAIFA i MEGAFONE morreu als 39 anhos, bítima de cáncaro de ls pulomones.
Aguardela, fui ne ls ultimos anhos ua de las grandes refrencias de la música popular pertuesa. Quien ye la persona que ya nun se recorda de músicas cumo "Esta vida de marinheiro está a dar cabo de mim! Papapara..." i "Vamos ao circo do amor, meninos e meninas..."

Mas de todas las músicas gustarie de çtacar ua que muitas bezes calentou la nuite mirandesa.

ABOIO

Que dius bos l pague,

João Aguardela!

Diç que hai fiesta an Palaçuolo...

Mais anformaçones eiqui.

La nuossa tierra quier...

Clica eiqui pra ber l bídeo d'apersentaçon de la candidatura.

AGARRA-ME ESTES PALOS...

Por Dues Eigreijas!

Bibir an mirandés.

Hoije, al spertar, lhembrei-me d'ua question muito amportante. Será que anquanto you drumie habie moços i moças a falar la mie lhéngua? Será que ne l mundo anteiro algun moço ou algua moça stan agora a tener ua cumbersa an mirandés?Hoije, esta puode ser ua de las respostas mais amportantes pul feturo de la nossa lhéngua. Muito mais amportante que todos ls studos que se puodan fazer sobre la nuossa lhengua, que todas las campanhas, debates, çcuçones, teses i pensamientos.

Porque, hoije, se you sou moço i falo culs mius amigos an mirandés, se sperto an mirandés, se almuorço an mirandés, se studo an mirandés, se passeio an mirandés, se namorisco an mirandés, esso quier dezir que essa ye la mie lhéngua mai i eilha nun bai zaparecer.

Mas se nun la falo la mie lhengua, eilha bai morrer. I you nun quiero ber la mie lhéngua morrer.

I tu? You sei, que tamien nun quieres ber la nuossa lhéngua morta.

I hoije?

BIBES-TE ou nó an mirandés?

AGARRA-ME ESTES PALOS!

La nuossa lhéngua percisa de ti!

BIBE AN MIRANDÉS!

2008-2009 l bienio de las mudanças?

2008 ya stá anterrado, mas nun fui fácele, puis astanho que passou l mundo mudou i muito.

Anterrado l anho, hoije, nel mundo, la giente ten medo dua nuoba crise mundial, ne ls Stados Ounidos hai un persidente negro pula purmeira beç na stória. An Pertual, ls pursores lhuitan pula sue abaluaçon, apareciu la nuoba lhei de l tabaco, naciu l cumputador Magalhanes, Cristiano Ronaldo ganhou la bota d'ouro, Nelson Évora ganhou l'ouro ne ls Oulímpicos. An Miranda naciu la ARJM, la assoçiaçon de la mocidade mirandesa, la OTAD morreu i l feturo solo dius sabe, i hai que recordar tamien que naciu l festibal GEADA.

I an 2009?

Ne l nuobo anho, la crise bai demudar l capitalismo ne l mundo, l'Ouropa bai scolher l sou persidente, Pertual bai scolher l purmeiro-menistro i l goberno, i l nuosso cunceilho bai scolher l nuobo persidente de la camara. Mas esto bai ou nun bai demudar?...

FELIÇ ANHO NUOBO!

Apuis de l natal, GEADA 2008!

FELIÇ NATAL!

La cena de ls bigotes.

La cena bai a ser ne l restourante "L Pauliteiro", ne l die 20 de Dezembre, que le chaman alhá "Al Pauliteiro", cumo quera por culpa de ls homes de l café Bogani, que fazírun l reclamo. Nun son de Miranda, razon para nun saberen l mirandés...

ANSCRIÇONES: Nuobas de Fuonte Aldé