Nel passado Sábado, die 7, fui apersentado an Miranda, l nuobo Agrupamiento Ouropeu de Cooperaçon Territorial Douro/Duero (AOCT), que cunta cun 180 munecípios de ls dous lhados de la frunteira. Ls AOCT permiten que ls munecípios, apersenten perpuostas cunjuntas para chegar diretamiente a fondos quemunitarios.
José Saramago, screbiu sobre esso, sobre ls nuossos peixes, l nuosso riu i ls puobos armanos. Eiqui queda l testo:
Hai trinta anhos, quando inda era un moço i porbentura sperançoso scritor yá a la beira de cumberter-se an sexagenário, andaba you por tierras de Miranda de l Douro adonde daba ampeço a la inesquecíble abintura que benerie a ser la perparaçon i la eilaboraçon de l lhibro Biaige a Pertual. Nun era casual este títalo. Cul pretendie que l lheitor, lhougo na purmeira páigina, cumprendisse que desso se trataba, dua biaige a algua parte, percisamente Pertual. Para reforçar ne l miu própio sprito essa eideia sali de l paíç por Monçon i, durante ua sumana, andube por Galiza i Lheón até que, yá culs uolhos lhimpos de las eimaiges questumadas, abancei a la çcubierta de la tierra adonde nacera. Lhembro-me de tener parado ne l meio de la puonte que une las dues bordas de l riu, dun lhado, Douro, de l outro, Duero, i tener percurado an ban, ó fingido percurar, la lhinha de frunteira que, parecendo apartar, une afinal ls dous países. Pensei anton que ua buona maneira de ampeçar l lhibro serie glosar l famoso Sermon de Santo António als Peixes de l Padre António Bieira, dirigindo-me als peixes que nadan nas augas de l Douro i preguntando-les de que lhado se sentian eilhes, spresson talbeç demasiado clara dun angénuo suonho de amisade, de cumpanheirismo, de mútua colaboraçon antre Pertual i Spanha. Nun caiu an saco roto la outópica perpuosta. Naquel mesmo lhugar de l riu, arrodeados pula auga quemun, acaban de reunir-se ls repersentantes de 175 munecípios ribeirinhos dun lhado i de l outro para debatíren subre la criaçon dua agrupaçon capaç de cordenar açones de zambolbimiento i definir planos biables de feturo. Talbeç nanhun de ls persentes tenga lhido la mie berson de l sermon de l Padre António Bieira, mas l sprito de l lhugar andaba a chamá-los hai trinta anhos, i eilhes fúrun. Bien benidos todos.
José Saramago
Traduçon: Fernando Silva
Retrato: Nuoba Guarda
L "Festival Intercéltico de Sendim" que astanho bai festeijar la sue 10ª ediçon, antre ls dies 31 de Julho i 1 d'Agosto, yá ten cartaç i ye de ls buonos. Ne l purmeiro die, ls "Lenga Lenga" de Sendin i "Maria Salgado" ban abrir la fiesta que ancerrará cul sonido de ls suecos "Hedningarna" (retrato) que pula 2ª beç tornan al festibal. Die 1, "Korrontzi" ua de las bandas cun más feturo ne l folk ouropeu, i la spriente "Brigada Victor Jara" i "Llan de Cubel" de las Astúrias "ancerran la fiesta.
