Deolinda i Fernando Pereira nas Fiestas de Sta. Bárbela.

Las Fiestas de Santa Bárbela ban tener astanho la animaçon de dous grandes nomes de la música pertuesa.

L purmeiro ye DEOLINDA, un de ls mais amportantes porjetos de la música tradecional pertuesa. Para quien nun ls coinece bien solo bos podemos dezir que eilhes, Deolinda son çfrientes... Ye fado, mas nun ye l fado triste, ye l fado a la moda de Deolinda, l fado cun quelor, muita quelor i fuorte muito fuorte. Por esso, die 21 nun stranheis oubir fado sin ber ua guitarra pertuesa nas manos de un tocador porque Deolinda ye esso, fado çfriente.

Yá die 22 bai tornar a la nuossa cidade FERNANDO PEREIRA, l home de las mil i ua bozes, zde Michael Jackson, a Tina Turner, Tom Jones, Roberto Carlos, Maria Bethania, António Variações, ó mismo Luciano Pavarotti.

Assi equi queda l porgrama i l nuosso cumbite... Beni a besitar-nos!

Porgrama:

Die 19 - Banda NV3

Die 20 - Fiesta de la Mocidade - Org. ARJM

Festibal de Nuobos Balores Mirandeses

Cuncerto cun Duff

Dj Stick

Die 21 -Função Públika i DEOLINDA

Die 22 - Roconorte i FERNANDO PEREIRA

Die 23 - KGB i Grande Çcarga de fuogo d'artificio

Cultura i lhéngua Mirandesa son çtaque ne l Festibal Art&Tur.

La lhéngua i la cultura mirandesa ban tener çtaque na 2ª Eidiçon de l ART&TUR - Festibal Anternacional de Filmes de Turismo, que se rializará de 23 a 27 de Setembro an Barcelos.

L Art&Tur ye un festibal que bisa promober produçones audiobisuales, benidas de qualquier paíç de l mundo, qu'anfatizen l papel i la funçon de l Turismo na sociedade mais abançada, nas sues múltiplas dimensones, rialçando ls lhugares, las paisaiges, la quemunicaçon, la spitalidade i las anfra-struturas, a par de l'aspetos stórico-culturales, enológicos i gastronómicos, bien cumo de las artes populares i de l'artesanato. Ban star repersentados ne l festibal culs sous filmes mais de 30 paises. L Art&Tur ye assi un fórun cultural anternacional i ua bitrina de promoçon de Pertual cumo Çtino Turístico scepcional

Assi Miranda bai ser repersentada cun las Comemoraçones de ls 10 anhos de oufecialidade de la Lhéngua Mirandesa al lhargo de festibal, assi bai haber la apersentaçon de ls Lusíadas an Mirandés cul Pursor Amadeu Ferreira, l'atuaçon de ls Pauliteiros de la Cidade de Miranda de l Douro, de l Grupo de Gueiteiricos de Miranda de l Douro, para alhá dua cena tradecional Mirandesa, adonde nun faltará la Posta Assada a la Mirandesa. L documentário “De l Japon a la Tierra de Miranda” produzido pul rializador pertués Leonel Viera i rializado por Miguel Angel de Cía, subre las gientes i la cultura de las tierras de Miranda será tamien eisibido ne l Festibal.

Mas anformaçones: http://www.tourfilm-festival.com/

Agarra-me estes Palos,

ne l

Art & TUR!

1º Torneio Mundial de Rural Football.

Fizo-se esta sumana an Miranda de l Douro, l purmeiro Torneio de Rural Football, ourganizado pula ARJM - Associaçon Recreatiba de la Jubentude Mirandesa, ne l Jardin de ls Frades Trinus.

Muitos de bós habeis de star a pensar: "BÔ!! Mas l que ye esso?! Rural Football?! Ls garotos stan boubos!".

L Rural Football, ye l jogo de la bola a la buona moda de la mocidade mirandesa. Ye un jogo de la bola sin aquel tiu que stá na baliza, tamien nun ten baliza ten un pneu, nun ten lhinhas a marcar l campo ten fardos, i nun hai cartones nin amarielhos, nisquiera burmeilhos. L Rural Football ye l jogo de l nuosso puobo i de las nuossas rues.

Eiqui queda un cachico de l que fui l retorno de l jogo de la bola, al Lhargo de ls Frades Trinus, lhugar stórico adonde ya stubo l nuosso campo.

Agarra-me estes Palos!

Cun la Mocidade Mirandesa!

Galandum Galundaina, Sr. Galandum.

Ls Galandum Galundaina, yá stan a grabar l sou nuobo álbun que debe star a la benda an brebe.
Sr. Galandum ye l nome deste nuobo trabalho de un de ls mais recoinecidos grupos de la música mirandesa.

Este trabalho bai cuntar cun muitas partecipaçones speciales de çtacar Sérgio Godinho, la cantadeira galega Uxia, Luís Peixoto de ls Dazkarieh i de João Paulo. Mas nun hai suolo giente famosa, tamien la mai de 3 de ls tocadores de ls Galandum, Elionora Ventura, apuis de anhos a cantar músicas tradecionales mirandesas para adrumecer ls sous rapazes, bai dar la sue boç nas musicas "La Galinha" i "Mi mai tenie un huorto", musica que tamien cunta cun la boç de Helena Ventura. I cumo las bozes de ls mais nuobos tamien tenien que andar por ende, l Coro de la Scuola EB1 de Miranda de l Douro canta an "La Galinha".

Mais anformaçones an:

www.myspace.com/galandumgalundaina

www.galandum.co.pt/

Lenga Lenga, "L Teçtemunho".

L grupo de música tradecional mirandesa "Lenga Lenga - Gueiteiros de Sendin", purpara l'apersentaçon de l sou nuobo CD, cun 14 faixas, "L Teçtemhunho".

Segundo eilhes, este nuobo trabalho ye cumo l teçtemunho de ls corredores de las stafetas, nun puode caer, tal cumo las nuossas raizes i tradiçones tamien nun puoden caer ne l squecimiento.

L Disco cunta tamien cun 4 cumbidados de l praino, Vanessa Martins, Ângela Topa i de ls gueiteiros Tiu José Maria Fernandes d'Urrós i Tiu Ângelo Arribas de la Freixenosa.

Se quejirdes saber mais un cachico besitai:

http://www.lengalenga.net/

http://www.myspace.com/lengalengagaiteirodesendim

Comemoraçones de l Die de la Cidade, de l 10 al 25 de Julho.

10 DE JULHO
CUNCERTO PULA BANDA FILARMÓNICA MIRANDESA

11 DE JULHO
FESTIBAL DE LA CANÇON


12 DE JULHO
OULIMPÍADAS ÇPORTIBAS DE L CUNCEILHO


17 DE JULHO
Porgrama “Berano Total “ de la RTP direto de Miranda de l Douro
FESTIBAL DE DANÇAS MISTAS


18 DE JULHO
FESTIBAL DE PAULITEIROS

25 DE JULHO
TRIATO

Festibal de la Cançon "Mirandesa"?!

Ne l próssimo die 11 de Julho, ls melhores tocadores i cantadores de l praino ban star ne l strado de l Jardin de ls Frades Trinus, pul XXIII Festibal de la Cançon de Miranda de l Douro.

L stórico festibal, ne l qual tenen nacido, alguas de las mais guapas músicas mirandesas, fai-se mais ua beç cun un regulamiento que deixa tristes to ls mirandeses. Mais ua beç, ne l regulamiento l mirandés ye bisto cumo ua lhéngua de opçon. Segundo l regulamiento, scrito tamien mais ua beç solo an pertués, "podem apresentar-se a concurso todas as pessoas individuais ou colectivas que não façam parte do júri ou da respectiva organização, podendo cada concorrente apresentar uma ou mais composições musicais inéditas, de duração não superior a quatro minutos, com tema livre e opcionalmente redigidas em Língua Mirandesa."

Assi mirandeses i mirandesas, se quien gobierna la nuossa tierra be l mirandés cumo ua lhéngua d'opçon, bós nun podeis fazer cumo eilhes.

Mirandeses i mirandesas apersentai to las buossas músicas na lhéngua de todos nós!

Que ne l festibal las arribas se sbarrulhen culs sonidos de la lhéngua mirandesa, que la giente bata palmas an mirandés, que se alçen de las sous cadeiras an mirandés, que canten an mirandés!

Ne l festibal de la cançon mirandesa, que se biba an mirandés!

Feira de anstrumentos Musicales, 25 de julho al 2 de Agosto

Sob la respunsabilidade de la Delegaçon Regional de la Cultura de l Norte i la Junta de Castielha i Lhion, ne l ámbito de l POCTEP (Porgrama Ouperatibo de Coperaçon Transfronteiriço Spanha Pertual), nace l porjeto Lhinha Mestre, adonde se únen bários agentes culturales, para la rializaçon dua Feira de Strumientos Musicales Eibéricos que cuntará cula colaboraçon de la Galandun Galundaina Associaçon Cultural, Lérias Associaçon Cultural, Sons da Terra, AEPGA – Associaçon para l Studo i Proteçon de l Ganado Asinino i de l Folclore de Mogadouro.

Cun la feira quier-se dibulgar un setor de las artes i oufícios de raiç manufatural, cun ancidéncia para strumientos musicales, bien cumo proporcionar la anteraçon antre musiqueiros i custrutores, ua beç que ls musiqueiros son ls percipales outilizadores de ls strumientos tradecionales.

Un ancontro de música tradicional eibérica, un eibento que acuolhe custrutores de strumientos spondo i bendendo l sou trabalho: gaitas-de-fuolhes, cuncertinas, sanfonas, outros strumientos de cuordas, sopro, percusson i muitos mais...

La animaçon permanente será ua aposta zde, oufecinas de baile i música, apersentaçon de strumientos, atibidades para ninos, debates antre músicos... Ua ouportunidade para coinecer la bariadade i riqueza de la música tradecional

Mais anformaçones:

www.fim.pt.vu

Fiesta de San Judas Tadeu

Ye yá ne ls próssimos dies 3 i 4 de Julho que se bai rializar ua de las grandes fiestas de la cidade de Miranda de l Douro. Ne l die 3, sesta-feira, hai ua grande Caracolada (tamien hai moelas!!) Ne l die 4, hai ua arruada cun l grupo de Pauliteiros de la Cidade de Miranda de l Douro, Torneio de Malha, sardinada i baile cun l grupo NV3.

Ls mardomos, la mocidade de l Bairro de la Terronha, cunbidan to la populaçon a star persente nua de las mais stóricas fiestas de la nuossa cidade.

Agarra-me estes Palos,

nas Fiestas de San Judas Tadeu!

Crocodilhos ne l Douro. Eilhes yá ls bírun.

Ls crocodilhos andan mismo por ende i uns moços mirandeses yá ls bírun. L nuobo bídeo, hoije dibulgado pul "Agarra-me estes Palos" proba assi l'eisistencia dua nuoba raça de crocodilhos, l CROCODILHO MIRANDÉS.

Ls outores de l bídeo, son coinecidos cumo Chico i Topo, dous berdadeiros ambestigadores de l Riu Douro mirandés.

Acampamiento "Ala pra Miranda", 22 a 25 de Julho.

Ne ls próssimos dies 22 a 25 de Julho, la Cámara Munecipal de Miranda de l Douro, ourganiza l acampamiento "Ala pra Miranda".

Durante l acampamiento ls partecipantes ban coinecer ls caminos, la fauna i la flora de l praino, fazer çporto i beilar al sonido de muita música tradecional.

L'acampamiento ye para moços de ls 18 als 30 anhos i ten lotaçon para 50 personas. L précio de las anscriçones ye de 50 €.

Mais anformaçones eiqui.

3ª Maratona de Futsal, Atenor, 11 i 12 de Julho.

Lusíadas.

Ls Lusíadas an Mirandés ban chegar inda este més a las lhibraries.

La traduçon de l'eipopeia de Camões, feita pulas manos de Amadeu Ferreira, al lhargo de 5 anhos, será apersentada ne l Clube Lhiterário de l Porto, ne l die 19 deste més.

La obra será tamien apersentada an Lhisboa, ne l die 2 de Julho, na Fundaçon Mário Soares i an Miranda de l Douro, ne l die 10 de Julho, l Die de la Cidade.

I assi, na tierra de ls boubos, nacírun mais 10 cantos i 1102 stáncias pula stória de la lhéngua mirandesa.

AGARRA-ME ESTES PALOS...

PULA LHÉNGUA MIRANDESA!

Fuonte: Diário Digital

"Do Japão à Terra de Miranda", manhana na RTP 2, pulas 21h00.

La RTP 2 bai passar manhana, die 31 de maio, pulas 21h00, l decumentário

"Do Japão à Terra de Miranda",

produzido pul mirandés Leonel Viera i rializado por Miguel de Cía.

Yá sabeis manhana hai que birar las antenas puls lhados de la RTP2!

La nuossa agricultura stá an crise.

Ls agricultores de l Praino Mirandés biben tiempos malos. La tierra astanho nun stá a dar cereal, cumo ne ls anhos passados, i ls agricultores yá se manifestórun al Menistério de la Agricultura.

Esta ye ua nuoba mala pul praino, i ye amportante amostra-la a to la giente, puis milhares de mirandeses biben de la agricultura i por esso la crise que anda por ende puode medrar mais un cachico por acá.

Fuonte: RTP

Menistério de la Cultura fai un nuobo mapa de l Praino Mirandés.

Segundo l Menisterio de la Cultura de Pertual, este ye l nuobo mapa de l Reino de ls Boubos de Miranda de l Douro.

Postal de A. Leitão

Menistro de la cultura cumpara falantes de l Mirandés als «Boubos» gauleses!

L menistro de la Cultura cumparou esta segunda-feira ls falantes de l Mirandés als «boubos» gauleses de la aldé de Astérix que ansistian an ampor la sue lhéngua minoritaria.

«Acá tamien hai uns boubos pertueses que biben an Miranda de l Douro i falan outra lhéngua», diç José António Pinto Ribeiro que, citado pula Lusa, augura muitas deficuldades a la «lhengua» falada an Miranda de l Douro. Stimular la spanson de la léngua ye «mui defícel», subretodo quando aqueilha nun ten atrás de si un grande númaro de falantes, splica.
Ls comentairos de l menistro benen an repuosta als anseios de l persidente de la Cámara de Miranda de l Douro, Manuel Rodrigo, que teme la transformaçon de l «Mirandés» nua lhéngua erudita scrita. L menistro promete "trabalhar an cunjunto cula outarquie i culs eruditos que trabalhan aqueilho", para tentar çfender la segunda lhéngua oufecial de Pertual.

Sr. Menistro,

Se quier falar de l Mirandés (falou hoije, an público, pula purmeira beç) fale!

Mas fale cumo un menistro debe falar!

Nós nun percisamos de poçones, percisamos de deçisones!

AGARRA-ME ESTES PALOS!

PROUA AN SER MIRANDÉS!

Fuonte: Lusa, TVI

Ua nuoba cumbençon..

Hai por ende un blogue donde cada un de bós pode botar ua mano na construçon dua nuoba scrita de la lhéngua mirandesa.

L blogue cunta cun la partecipaçon de ls studiosos de l mirandés, cumo son Manuela Barros Ferreira, Amadeu Ferreira, Duarte Martins, entre outros i deiqui irá salir la perpuosta para la 2ª adenda a la cumbençon ourtográfica de la lhéngua mirandesa.

Se quejirdes botar ua mano antrai eiqui:

CUMBENÇON 2009

ARJM fui çtinguida cul prémio "Mérito Associativo Juvenil".

La Associaçon Recreatiba de la Jubentude Mirandesa (ARJM) stubo, ne l passado die 8 de Maio, nas Jornadas "L Associatiismo Jubenil i l'Ouropa", rializadas an Braga, pula Direçon Regional de l Norte de l Anstituto Pertués de la Jubentude.
Estas jornadas tenien cumo propósito comemorar l die de l Associatibismo i l die de la Ouropa, bien cumo atribuir l Prémio de Mérito Associatibo Jubenil de la Region Norte.
Para l prémio, fui scolhida an cada çtrito de la region norte ua associaçon jubenil que durante l anho de 2008 se çtinguiu pulas sues buonas práticas ne l apoio al moços i a la quemunidade. Ne l çtrito de Bergáncia la ARJM fui la nomeada, i tal cumo las associaçones de l outros çtritos rializou ua apersentaçon, adonde mostrou l trabalho rializado al lhargo de 2008.
Passadas las apersentaçones ls júris reuniran, i decidiran repartir l prémio pulas 5 associaçones, bisto cada ua tener fines çtintos, sendo defícel fazer ua abaluaçon cumparatiba.
La direçon de la ARJM recebiu esta çtinçon cun sastifaçon, i agradeciu an nome de ls sous sócios a todos aqueilhes que la apoiórun na prossecuaçon de ls sous oujetibos.
La ARJM lamenta, inda assi, que este recoinecimiento a nible regional, nun acunteça al nible lhocal, adonde l ampato de l sou trabalho ye mais bisible.

Museu de las Tierras de Miranda, ua bida nuoba.

La secretaira de Stado de la Cultura, Paula Fernandes dos Santos, besitou Miranda de l Douro. Acá anunciou, l porjeto de las obras de requalificaçon i ampliaçon de l Museu de las Tierras de Miranda, ourçadas an cerca de dous milhones i 200 mil ouros. La misma inda nun apuntou an cuncreto ua data para l arranque de la ampreitada, mas adiantandou que l sou ampeço stá prebisto para 2010.

Tal obra ben a publico quando fui tamien anunciado que l nuosso museu ye un de ls más besitados de l nuosso paiç. Astanho passórun pul museu más de 18 mil besitantes.

La Secretaira de Stado falou tamien de las obras que la nuossa Sé yá percisa fai anhos, mas nun dou qualquier anformaçon, solo antençones, l que segundo l persidiente de la Cámara Munecipal, Manuel Rodrigo nun son repuostas cuncretas nin pul museu, nin pula sé catedral.

Fuonte: RBA, Brigantia

Retrato: commons wikimedia