Crocodilhos ne l Douro. Eilhes yá ls bírun.

Ls crocodilhos andan mismo por ende i uns moços mirandeses yá ls bírun. L nuobo bídeo, hoije dibulgado pul "Agarra-me estes Palos" proba assi l'eisistencia dua nuoba raça de crocodilhos, l CROCODILHO MIRANDÉS.

Ls outores de l bídeo, son coinecidos cumo Chico i Topo, dous berdadeiros ambestigadores de l Riu Douro mirandés.

Eilhes andan mismo por ende!

L nuobas "La Opinion de Zamora" tenie rezon. Hai crocodilhos an Miranda!

Mas eilhes yá se scapórun de l Riu Douro. Subírun ls arribes i stán agora a ambadir l Riu Fresno. Diç que yá furun bistos dous ne l spelho d'auga turba.

L'ambiada special de l Agarra-me estes Palos, la Reporter de las Saias, yá cunseguiu apanhar l retrato dun deilhes.

Cumo podeis ber este crocodilho ye de la família de ls crocodilhos eibéricos, naturales de las ourrietas de Santa Clara an Zamora.

Inda nun hai nuobas de grande çturiçon, nin d'ataques a personas puls crocodilhos. Mas stán zaparcidas nuobe pitas dun galhineiro na zona de l ping.

Mais anformaçones an brebe!

Ls crocodilhos! Adonde? Eilhi ban dous!

Mius amigos hoije quien quejir ir banhar-se al Riu Douro nun bai tener nanhue surpresa mismo ambaixo de las sous piernas. Podeis ir alhá baixo al riu tomar un banhico daqueilhes balientes, se bien que l'auga de l riu, grácias al paiç bezino, tamien nun ye de las melhores i l tiempo puode tamien inda nun star pra esso, mas crocodilhos nun hai nin un.

You nun sei porque, mas esta ye mais ua daqueilhas nuobas que ls nuossos armanos tanto gusto lhes dá poner por ende. Eilhes yá ambentórun stórias de queluobras, desta beç fui crocodilhos, mas ls pauliteiros de la buossa tierra nun bos deixan star mais tiempo anganhados.

L senhale stá alhá porque l duonho de l barco de l passeio ambiental nun quier que las personas se banhen alhá. Solo por esso.

Nun fui la cámera quien puso l senhale, nin sequiera sabie de l senhale i tamien nun hai nuobas de crocodilhos zaparcidos an Spanha. Todo nun passa de mais ua anzonice de l nuobas "La Opinion de Zamora".

La Cámera Munecipal ten ye que poner alhá ua placa na puonte de la barraige a dezir "Peligro jornalista spanhol - Nun bos arrimeis!"

Mas mais ua beç eiqui queda la pregunta que muitos de ls bezitantes i mismo ls mirandeses que miran l riu i solo áchan xardas i bogas, gustarian de fazer als jornalistas deste nuobas:

Eilhes andan por ende...

I quantos son?

Peligro! Hai crocodilhos ne l Riu Douro!

Ahh... Nun ye mentira, ye bien berdade, hai crocodilhos ne l riu douro. Cumo podeis ber la cámara munecipal puso senhales pul riu cumo l que stá nel retrato. "Danger Crocodiles-No Swimming" ó cumo habien de ser ls sinales "Peligro Crocodilhos - Nun ir a banhos". Assi ye agora proibido ir a banhos ne l Riu Douro.

Anté agora hai poucas anformaçones, mas segundo l nuobas "Oupenion de Zamora", ls crocodilos chegórun al riu, apuis de séren lhibertados por un particular, que ls cumprou quando éran pequeinhos, mas que al crecíren çfeç-se deilhes.

La zona peligrosa bai zde de la puonte de la barraige de Miranda anté a la barraige de l Castro de Alcañices an Aliste. Assi las zonas adonde se debe tener mais atençon son Villardiegua de la Ribera, Torregamones i Fonfría, de l lhado de Spanha, i acá an Miranda, Bal D'Aila, Aldinuoba i Paradela.

Eilhes andan por ende...

I quantos son?

Retrato: Ch. S.