quinta-feira, setembro 25, 2008

Politicos de Miranda... i la gaita i la çanfona... i l... i la...

La blogosfera mirandesa stá a gerar controbersia i todo porque ne ls ultimos tiempos aparecirun pula anternet blogues cun temas que nun agradan a toda la giente. Uns falan de temas de l bota abaixo, outros de sexo, antre outros.
Mas hai dous an que las çcussones stan bien calientes i por esso ye tiempo de falar deilhes.
Por eisemplo, fai poucos dies apareciu pur ende un blogue que quier fazer las pessonas çcutir sobre ls nuobos politicos de Miranda. L blogue ten l nome de Políticos de Miranda. Segundo, l blogger, ua pessona anonima, l oujetibo de l blogue ye çcutir la purparaçon de ls partidos pa las prossimas eileiçones pula camara, bien cumo las sues eiquipas, stratégias i mensaiges. Mas zde de que apareciu, l blogue solo ten criado un clima de suspeiçon i las çcuçones nun son nien sequiera custrutibas pa la nuossa tierra. L único i mortal porblema daqueste blogue ye que las pessonas nun çcuten l feturo de la nuossa tierra, nun çcuten las eideias, nien ls porjetos de ls candidatos coinecidos. Las pessonas ne l blogue Políticos de Miranda ampeçoran, pur orientaçon de l bloguer, a çcutir solo ls candidatos, l que nunca pode ser l camino pula eiboluçon democrática de las Tierras de Miranda.
Mas l que mais cuntrobersia criou ne ls ultimos tiempos fui mismo l Gaita i la Çanfona. Nel einício la sue tematica, l SEXO, i la sue lhenguaige, muito çfrente de la que la giente stá aquestumada de ler an mirandés, fizo cun que la maiorie de las pessonas çcutissen se la criaçon de l blogue serie ou nó ua buona eideia. Mas porque nó? Apesar de la palabra SEXO ser un tabu pa la maiorie de ls mais bielhos, l SEXO tamien puode ser tema de la lhiteratura bloguista Mirandesa... Se la ciéncia, las tradiçones, l tiempo, l ambiente, las streilhas, ls trabiessos de ls nuossos políticos, las berças de las nuossas abós son temas de la lhiteratura mirandesa porque nó l SEXO?...
Apuis de tanta scrita, ua concluson hai para retener cun estes nuobos blogues, antre outros. Todos eilhes pouco a pouco nos mostran, a aqueilhes que por eiqui andan fai mais tiempo, que l'anternete afinal ye mismo un meio d'arribar a las pessonas i que puode muito bien ser la arma pra cumbater l'anterioridade, la falta de ouportunidades i l anstrumiento pra çcutir ls porblemas de la nuossa tierra.
Pula anternete pudemos çcutir política zde que haba regras criadas por ua quemunidade, i pula anternet pudemos screbir l que quejirmos na lhéngua de todos nós. Mas nós, ls bloguers i ls leitores mirandeses tenemos, tamien, que tener concéncia que l'anternete ye apenas l camino pra atingir ls oujetibos de zambolbimiento traçado pra la nuossa tierra na bida real, puis l'anternete ainda nun fai milagres...

5 comentários:

Boieiro disse...

Á pauliteiro, sabes l que te digo? L "politicos de miranda" que fale a buntade i que se ponga a boziar zde que nun seia a zurzir nas personas mas si na figura de l político. Esse que arresponda cume tal i que bote eideias nuobas pal cunceilho. Pal cunceilho!!!
Quanto a la gaita i la çanfona solo tengo un quementairo: quien nun quier ler que nun baia alhá.
I por falar no Naso ... será siempre l terreiro dal Praino. Mas Miranda que se aporcate a tiempo i afirme más pul que fai i menos pula maledicéncia senó anté ls terreiros puoden mudar de sítio ...

Abraços

Boieiro disse...

Mira outra cousa: ye falta mie ou este sítio está mui "pesado". falo esto porque tengo quaije siempre muitas deficuldades an l'abrir.

poucabergonha disse...

Buonas tardes para tod'mundo!

Ah dançadores, stou cun ls uolhos rasos de auga, por ber las palabras tan buonas que l miu cantigo bos merece!
Home, i you que pansaba que naide le botaba fé a las mies boubadas... i benis bós a amantar an "cuntrobérsia" i cousas assi!
Tengo que cunfessar que me deixais cheno de proua! Ye que, sabeis?, you stou cumo ls spanholes: "l que fai falta ye que fálen de nós... inda que mal!"
I de l assunto(que nun ye l sexo, ye la mie bida, que culpa tengo you que las dues cousas se ambaránhen tanto?!), fago mies las palabras deste eiqui anriba (biba, ah Boieiro!): quien fur alhá i nun le agradar la cumbersa, puorta de la rue, serbantie de la casa... quien los chamou que ls ampunte!
Isto, bós nun bedes?, yá l Fócrates dezie que la bida ye ua Soda!
Bah, un abraço i chiçcai-le cun fuorça als palos... que ls "palos" mirandeses nunca déien seinhas de falta de fuorça!

Zeek disse...

Biba!
Stá buona, esta puosta!
You stou de acordo cun todo que dezis eiqui!

Anónimo disse...

Será Sócrates? Ass num stá bien!
Quien fui que buiu la sicuta?
Ansinai-me um cachico!
Uma buona torrada untada com toucino e bamos caminando!
You num cuncordo cum nada destas cousas!